న్యూ ఢిల్లీ: భారత్ లో వన్డే ప్రపంచకప్‌ సందడి మొదలైంది. ఎక్కడ చూసినా ఈసారి ప్రపంచకప్‌ ఎవరిదనే చర్చే జరుగుతోంది. ఈసారి వ‌న్డే ప్రపంచ క‌ప్ ను ఒడిసిపట్టాలన్న సంకల్పంతో అన్ని జట్లు అస్త్రశ‌స్త్రాలు సిద్ధం చేసుకుంటున్నాయి.ఈ మెగా టోర్నీకి ఇంకా రెండు నెల‌న్నర రోజులే స‌మ‌యం ఉండడంతో అన్ని జట్లు తుది జట్లను సిద్ధం చేస్తున్నాయి. ఈ నేపథ్యంలో ఐసీసీ(ICC)ప్రపంచ క‌ప్ మ‌స్కట్‌ ల‌ను విడుద‌ల చేసింది. క్రికెట్‌లో పురుషులు, మ‌హిళ‌లు స‌మాన‌మే అనే ఉద్దేశంతో ICC ఈ మ‌స్కట్లను తెచ్చింది. గురుగ్రామ్‌లో జ‌రిగిన ప్రత్యేక కార్యక్రమంలో అండ‌ర్ -19 వ‌ర‌ల్డ్ క‌ప్ విజేత‌లు య‌శ్ ధూల్, ష‌ఫాలీ వ‌ర్మ‌ స‌మ‌క్షంలో వీటిని ఆవిష్కరించారు. పురుషుల మ‌స్కట్ నీలి రంగుల , మ‌హిళ‌ల మ‌స్కట్ ఎర‌పు రంగులో ఉన్నాయి. వ‌ర‌ల్డ్ క‌ప్ పోటీల ముందు మ‌స్కట్‌ల‌ను విడుద‌ల చేసినందుకు చాలా సంతోషంగా ఉందని సీసీ ఈవెంట్స్ అధ్యక్షుడు క్రిస్ టెట్లీ వెల్లడించాడు. మ‌హిళ‌ల మ‌స్కట్ ద్వారా ఈ లోకంలోని స‌మానత్వం, వైవిధ్యాన్ని చాటుతున్నామని తెలిపారు. త‌ర్వాతి త‌రం అభిమానుల‌కు చేరువ‌య్యేందుకు ఈ మ‌స్కట్‌లు ఎంతో ఉప‌యోగ‌ప‌డ‌తాయని టెట్లీ తెలిపారు. క్రికెట్ మీదున్న ప్రేమ‌ను ప్రపంచానికి చూపేందుకు ఈ రెండు మ‌స్కట్‌లు దోహదపడతాయని తెలిపారు.