విమాన యాన సంస్థలు ఆఫర్లను ప్రకటించి ప్రయాణికుల్ని ఆకర్షించడంలో పోటీ పడుతున్నాయి. సోమ, మంగళవారాల్లో ఎయిర్‌ఏషియా, స్పైస్‌జెట్‌లు ప్రత్యేక ఆఫర్లు ప్రకటిస్తే... ఇప్పుడు ఆ జాబితాలో ఇండిగో కూడా చేరింది. నిర్దేశించిన రూట్లలో టిక్కెట్లను డిస్కౌంట్‌ ఆఫర్లపై అందిస్తున్నట్లు చెప్పింది. దేశీయ రూట్లలో టిక్కెట్‌ ప్రారంభ ధర రూ.806గా నిర్ణయించినట్లు తెలిపింది. గురువారంలోపు ఈ తగ్గింపు ఆఫర్‌ ద్వారా టిక్కెట్లు బుక్‌ చేసుకోవచ్చని చెప్పింది. జులై4 నుంచి సెప్టెంబరు 30లోపు ప్రయాణించాలనుకున్న వారు ఈ ఆఫర్లో టిక్కెట్‌ బుక్‌ చేసుకోవాలని సూచించింది.
* శ్రీనగర్‌-చండీగఢ్‌, శ్రీనగర్‌-జమ్ము రూట్లలో ప్రయాణించాలనుకున్న వారు ఈ ఆఫర్‌ ద్వారా రూ.806కే టిక్కెట్‌ బుక్‌ చేసుకోవచ్చని చెప్పింది.
* దిల్లీ-ముంబయి, దిల్లీ-కోల్‌కతా రూట్లలో రూ.2,668 నుంచి, దిల్లీ-బెంగళూరు రూట్లో రూ.3,408 నుంచి టిక్కెట్‌ ప్రారంభ ధర ఉంటుందని తెలిపింది.
మంగళవారం స్పైస్‌ జెట్‌.. దేశీయ రూట్లలో విమాన టిక్కెట్‌ ప్రారంభధర రూ.511 అని ప్రకటించగా, సోమవారం ఎయిర్‌ ఏషియా సైతం ప్రత్యేక డిస్కౌంట్‌ ఆఫర్‌ ప్రకటించిన విషయం తెలిసిందే.