దోహా: రిలయన్స్ ఇండస్ట్రీస్ లిమిటెడ్ (రిలయన్స్ ఇండస్ట్రీస్) అనుబంధ సంస్థ అయిన రిలయన్స్ రిటైల్ వెంచర్స్ లిమిటెడ్ (RRVL)లో రూ.8,278 కోట్ల (సుమారు $1 బిలియన్) పెట్టుబడి పెట్టనున్నట్లు ఖతార్ ఇన్వెస్ట్‌మెంట్ అథారిటీ (QIA) ప్రకటించింది. QIA పెట్టుబడి RRVLలో 0.99% మైనారిటీ ఈక్విటీ వాటాగా మారుతుంది. రిలయన్స్ ఇండస్ట్రీస్ లిమిటెడ్ తన అనుబంధ సంస్థల ద్వారా భారత్ లో 18,500 స్టోర్‌లు, డిజిటల్ కామర్స్ ప్లాట్‌ఫారమ్‌లతో పాటు కిరాణా, వినియోగదారు ఎలక్ట్రానిక్స్, ఫ్యాషన్ & జీవనశైలి మరియు ఫార్మా సెంటర్లను నిర్వహిస్తుంది. రిలయన్స్ రిటైల్ వెంచర్స్ లిమిటెడ్ డైరెక్టర్ ఇషా ముఖేష్ అంబానీ మాట్లాడుతూ..రిలయన్స్ రిటైల్ వెంచర్స్ లిమిటెడ్‌లో పెట్టుబడిదారుగా QIA చేరుతున్నందుకు సంతోషిస్తున్నట్లు పేర్కొన్నారు. తాము రిలయన్స్ రిటైల్ వెంచర్స్ లిమిటెడ్‌ను ప్రపంచ స్థాయి సంస్థగా మరింత అభివృద్ధి చేయడం ద్వారా భారతీయ రిటైల్ రంగాన్ని మార్చేందుకు.. QIA గ్లోబల్ అనుభవం నుండి ప్రయోజనం పొందాలని ఎదురుచూస్తున్నట్టు తెలిపారు.  QIA సీఈఓ మన్సూర్ ఇబ్రహీం అల్-మహమూద్ మాట్లాడుతూ..భారతదేశం వేగంగా అభివృద్ధి చెందుతున్న రిటైల్ మార్కెట్లో ఒకటన్నారు. రిలయన్స్ రిటైల్ వెంచర్స్ లిమిటెడ్ దాని బలమైన పెట్టుబడుల పోర్ట్‌ఫోలియోలో చేరడం కోసం తాము ఎదురుచూస్తున్నట్లు పేర్కొన్నారు.