ఫిలిగ్రిమ్స్‌ అక్రమంగా నివసించినట్లయితే వారిపై కఠిన చర్యలు తీసుకోబడ్తాయని అధికారిక వర్గాలు హెచ్చరించాయి. భారీ మొత్తంలో జరీమానా, అలాగే జైలు శిక్ష విధించబడ్తాయని అధికారిక వర్గాలు పేర్కొన్నాయి. పాస్‌పోర్ట్‌ డిపార్ట్‌మెంట్‌ అధికారి ఒకరు ఈ విషయాల్ని వివరిస్తూ, వీసా గడువు కన్నా ఎక్కువ రోజులు నివసించే ఫిలిగ్రిమ్స్‌కి 50,000 సౌదీ రియాల్స్‌ జరీమానా, ఆరు నెలల జైలు శిక్ష విధింపబడ్తుందనీ, వీటి అనంతరం దేశం నుంచి పంపివేయబడ్తారనీ చెప్పారు. స్థానికులు, ఫిలిగ్రిమ్స్‌కి అక్రమంగా నివసించేందుకు అవకాశమిస్తే వారికి 100,000 సౌదీ రియాల్స్‌, ఆరు నెలల జైలు శిక్ష ఉంటుందని చెప్పారాయన. ఏదైనా సంస్థ ఫిలిగ్రిమ్స్‌కి సంబంధించి సరైన సమాచారం ఇవ్వని పక్షంలో 100,000 జరీమానాతోపాటు, ఆ ఫిలిగ్రిమ్స్‌ బాధ్యత తీసుకున్న సంస్థని బ్లాక్‌ లిస్ట్‌ చెయ్యడం జరుగుతందనీ, వాటితోపాటుగా కంపెనీ మేనేజర్‌కి ఏడాదిపాటు జైలు శిక్ష తప్పదని, ఒకవేళ అతను వలసదారుడైతే జైలు శిక్ష పూర్తయిన వెంటనే దేశం నుంచి బహిష్కరించడం జరుగుతుందని వివరించారు. ఉమ్రా సందర్భంగా నిబంధనల్ని ఉల్లంఘించేవారిపై జనరల్‌ డైరెక్టరేట్‌ ఆఫ్‌ పాస్‌పోర్ట్‌ కఠిన చర్యలు తీసుకుంటుందని ఆ అధికారి చెప్పారు.