రియాద్: సౌదీ అరేబియాలోని అపారమైన సాంస్కృతిక ప్రాముఖ్యత కలిగిన దిరియా చారిత్రాత్మక క్వార్టర్స్‌లో రాయల్ దిరియా ఒపేరా హౌస్ నిర్మించనున్నారు. దీనికి సంబంధించి దిరియా కంపెనీ, రాయల్ కమీషన్ ఫర్ రియాద్ సిటీ సంయుక్తంగా ప్రణాళికలను ప్రకటించాయి. ఒపెరా హౌస్ రూపకల్పన కోసం ప్రపంచవ్యాప్తంగా గుర్తింపు పొందిన ఆర్కిటెక్చరల్ సంస్థ అయిన స్నోహెట్టాతో ఒప్పందం కుదిరిందని పేర్కొన్నారు. రాయల్ దిరియా ఒపేరా హౌస్.. రాజ్యంలో ఒక మార్గదర్శక సాంస్కృతిక వేదిక కానుంది. ఇది దిరియాలో యునెస్కో ప్రపంచ వారసత్వ ప్రదేశం అయిన అల్ తురైఫ్ సమీపంలో ఉంటుంది. ఈ ప్రాజెక్ట్ ను దిరియా కంపెనీ చేపట్టగా.. రాయల్ కమీషన్ ఫర్ రియాద్ సిటీ (RCRC)చే నిర్వహిస్తుంది. ఇది సౌదీ అరేబియా సాంస్కృతిక మూలాలు, భవిష్యత్తు విజన్ కు ప్రతిబింబిస్తుందని రాష్ట్ర మంత్రి, రియాద్ సిటీ కోసం రాయల్ కమీషన్ సీఈఓ  ఇబ్రహీం అల్-సుల్తాన్ తెలిపారు. సౌదీ వారసత్వాన్ని ఆధునికతతో విలీనం చేస్తూ రాయల్ దిరియా ఒపేరా హౌస్ కీలక మైలురాయిగా నిలుస్తుందన్నారు.