దుబాయ్:  అనుమానాస్పద కార్యకలాపాలు, రోడ్డు ప్రమాదాలు, చట్టాల ఉల్లంఘనలను ఇకపై మీ సమీపంలోని పెట్రోల్ స్టేషన్‌లో కూడా ఫిర్యాదు చేయవచ్చు. నివాసితులు, పర్యాటకులు అధికారుల నుండి సత్వర సహాయం కోసం ఇప్పుడు పోలీసు స్టేషన్‌ వరకు వెళ్లవలసిన అవసరం లేదని దుబాయ్ పోలీసులు వెల్లడించారు. దుబాయ్ పోలీసులు ఇటీవలే పెట్రోల్ కంపెనీలు ఎమిరేట్స్ నేషనల్ ఆయిల్ కంపెనీ (ఇనోక్), అబుధాబి నేషనల్ ఆయిల్ కంపెనీ (ADNOC),  ఎమారాట్‌లతో కలిసి ఆన్-ది-గో అనే కొత్త సేవను అందించారు. ఈ వినూత్న సేవ వ్యక్తులు ఉల్లంఘనలను నివేదించడానికి, భద్రతా చర్యలను మెరుగుపరచడంలో దోహదపడేందుకు మేలు చేస్తుందని దుబాయ్ పోలీసులు తెలిపారు. మొదటి లెఫ్టినెంట్ మజిద్ బిన్ సయీద్ అల్ కాబీ మాట్లాడుతూ.. "ఆన్-ది-గో" ద్వారా ఇంధనం నింపే స్టేషన్లలో పోలీసు సేవలను అందించడం ప్రపంచంలోనే మొదటి తరహదని అన్నారు.  దుబాయ్‌లోని 138 పెట్రోల్ స్టేషన్లలో ఈ సేవలు అందించబడుతున్నాయని, కస్టమర్లకు సహాయం చేయడానికి శిక్షణ పొందిన 11 సంస్థల నుండి మొత్తం 4,867 మంది సిబ్బంది ఉన్నారని తెలిపారు.