బహ్రెయిన్: బహ్రెయిన్‌లో విదేశీ కార్మికులు అప్పులు బాకీ ఉంటే దేశం విడిచి వెళ్లకుండా నిరోధించే ప్రతిపాదనను ఆమోదించడం ద్వారా బహ్రెయిన్ పార్లమెంటులో భిన్నభిప్రాయాలు వ్యక్తం అయ్యాయి. కొంతమంది చట్టసభ సభ్యులు దీనిని రుణదాతల విజయంగా అభివర్ణిస్తే, మరికొందరు ప్రాథమిక మానవ హక్కులను ఉల్లంఘిస్తుందని ఆందోళన చెందుతున్నారు. ఎంపి మరియం అల్ ధాన్ దీనిని తీవ్రంగా విమర్శించారు. ఉద్యమ స్వేచ్ఛను ఉల్లంఘించారని మరియు న్యాయవాదుల దోపిడీకి మద్దతుగా నిలిచారని నిప్పులుచెరిగారు. ఆమె అనేక  ప్రత్యామ్నాయ పరిష్కారాలను సూచించింది. ఎంపీ మహమూద్ మెర్జా ఫర్దాన్ మానవ హక్కులను గౌరవించాల్సిన అవసరం ఉందని తెలిపారు. అయితే రుణదాతలను కూడా రక్షించాలని కోరారు. చట్టంపై ఉన్న అపోహలను తొలగిస్తూ ఆర్థిక హామీలతో ప్రవాసులు ఇప్పటికీ వెళ్లిపోవచ్చని ఆయన స్పష్టం చేశారు. పొరుగు దేశాలలో ఇలాంటి చట్టాలు ఉన్నాయని, రుణగ్రస్తులు పారిపోకుండా ఆపాల్సిన అవసరం ఉందని ఎంపీ మమ్‌దౌహ్ అబ్బాస్ అల్సలేహ్ ఈ ప్రతిపాదనక మద్దతుగా నిలిచారు. పౌరులను మరియు రాష్ట్రాన్ని ఆర్థిక నష్టాల నుండి రక్షించడం తక్షణ అవసరంగా ఉందన్నారు. అయితే, ఎంపీ అహ్మద్ సబా అల్సలోమ్ రుణగ్రహీతలకు తొమ్మిది నెలల గ్రేస్ పీరియడ్ ఇస్తున్న ప్రస్తుత చట్టం చాలా సున్నితంగా ఉందని ఆయన మండిపడ్డారు. నష్టాలను నివారించడానికి కఠినమైన నిబంధనలను తీసుకురావాలని ఆయన కోరారు. చివరగా, ఎంపీ అహ్మద్ అబ్దుల్‌వాహెద్ ఖరాతా విదేశీ కార్మికులపై వివక్ష గురించి ఆందోళన వ్యక్తం చేశారు.  అందరికీ న్యాయం మరియు భద్రత ఉండేలా ప్రస్తుత చట్టాలను పూర్తిగా సమీక్షించాలని ఆయన కోరారు. మానవ హక్కులతో రుణదాత హక్కులను సమతుల్యం చేయడం, బహ్రెయిన్‌లోని నివాసితులందరికీ న్యాయమైన సమానత్వం అందించడం వంటి సంక్లిష్ట సవాళ్లపై ప్రత్యేకంగా ఫోకస్ పెట్టాలని కోరారు. తుది చట్టం ఎలా ఉంటుందో.. అది ప్రవాసులు మరియు రుణదాతల జీవితాలను ఎలా ప్రభావితం చేస్తుందో మరికొన్ని రోజుల్లో స్పష్టత వస్తుంది.