యూఏఈ: యూఏఈలో ఈ వీకెండ్ నుంచి వాతావరణం మారిపోనుందని వాతావరణ విభాగం వెల్లడించింది. తేలికపాటి నుండి మోస్తరు వర్షపాతం నమోదయ్యే అవకాశం ఉందని, కొన్ని ప్రాంతాల్లో మెరుపులు, ఉరుములతో కూడిన భారీ వర్షాలు కురిసే అవకాశం ఉందని నేషనల్ సెంటర్ ఆఫ్ మెటీరియాలజీ (NCM) తెలిపింది. అయితే, మంగళవారం సాయంత్రానికి వర్షాలు తగ్గుముఖం పట్టే అవకాశం ఉందని వాతావరణ శాఖ సూచించింది. బలమైన గాలులు ఆగ్నేయం నుండి ఈశాన్య మరియు వాయువ్య దిశకు మారతాయని, దీంతో గాలుల తీవ్రత పెరుగుతాయని పేర్కొంది. వీటి కారణంగా దుమ్ము మరియు ఇసుక తుఫానులు వీచే అవకాశం ఉందని, రోడ్లపై విజిబిలిటీ గణనీయంగా తగ్గుతుందని హెచ్చరించింది. వాహనదారులు అప్రమత్తంగా ఉండాలని, మారుతున్న వాతావరణ పరిస్థితులను ఎప్పటికప్పుడు తెలుసుకొవాలని సూచించింది. కాగా, కోస్తా ప్రాంతాల్లో తేలికపాటి వర్షపాతం (10మి.మీ మరియు 40మి.మీ మధ్య) కురిసే అవకాశం ఉందని, అంతర్గత ప్రాంతాలలో భారీ వర్షపాతం (50 మిమీ మరియు 80 మిమీ మధ్య) ఉంటుందని తెలిపింది.  అదే సమయంలో అబుదాబి, దుబాయ్ మరియు షార్జా తీర ప్రాంతాలలో 15 మిమీ - 50 మిమీ మధ్య వర్షపాతం నమోదయ్యే అవకాశం ఉందని వెల్లడించింది.