అమెరికాలోని న్యూయార్క్‌లో నిర్వహించే అంతర్జాతీయ యోగా దినోత్సవానికి ఔత్సాహికులు భారీ సంఖ్యలో హాజరయ్యే అవకాశం ఉన్నట్లు కార్యక్రమ నిర్వాహకులు వెల్లడించారు. ఇండియా పర్మనెంట్‌ మిషన్‌ ఆధ్వర్యంలో ఈనెల 20, 21 తేదీల్లో యోగా దినోత్సవాన్ని నిర్వహించనున్నారు. ఇప్పటికే దీనికి సంబంధించి అన్ని ఏర్పాట్లు పూర్తి చేసేందుకు సన్నాహాలు చేస్తున్నారు. ఇషా ఫౌండేషన్‌ వ్యవస్థాపకుడు, ఆధ్యాత్మిక గురువు జగ్గీ వాసుదేవ్‌, 2014 మిస్‌ అమెరికా నినా దవులూరి, ఐక్యరాజ్యసమితి ప్రముఖులు టైమ్‌ స్క్వేర్‌ వద్ద జరిగే ఈ కార్యక్రమానికి హాజరుకానున్నారు. సద్గురు ఈ కార్యక్రమంలో పాల్గొని ప్రత్యేక సందేశాన్ని ప్రజలకు అందించనున్నారు.అక్కడ ఉన్న స్థానిక భారతీయుల కోసం భారత దౌత్యకార్యాలయం వారం పాటు పలు కార్యక్రమాలను చేపట్టనుంది. ఇందులో భాగంగా యోగాపై అవగాహన కల్పించనుంది. పాఠశాలలు, ఆలయాలు, జేఎఫ్‌కే అంతర్జాతీయ విమానాశ్రయం, నేవార్క్‌ విమానాశ్రయంలోను యోగా కార్యక్రమాలను నిర్వహించనుంది.