విశ్వ నటుడు కమల్ హాసన్ సినిమా అంటే అదో క్రేజ్. ఇక, ఆయన నట విశ్వరూపం గురించి ప్రత్యేకంగా చెప్పడానికేముంది. ఎన్నో దృశ్య కావ్యాలు ఆయన నుంచి వచ్చాయ్. లేటెస్ట్‌గా ఈ వయసులోనూ ఆయన నటించిన ‘విక్రమ్’ సినిమా రికార్డులు కొల్లగొట్టింది.

ఇదే జోష్‌తో ఓ వైపు ‘ఇండియన్ 2’ సినిమా పూర్తి చేసేశారాయన. అలాగే మరోవైపు ప్రపంచం ఎదురు చూస్తున్న ‘కల్కి 2898ఏడీ’ సినిమాలో మెయిన్ లీడ్ విలన్ రోల్ పోషిస్తూ అందరి దృష్టీ విశేషంగా ఆకర్షిస్తున్నారాయన. ఇక, ‘కల్కి’ మరో మూడు రోజుల్లో ప్రేక్షకుల ముందుకు రానుంది.

అంతకు రెండు రోజులు ముందే ఆయన నటించిన ‘ఇండియన్ 2’ ట్రైలర్ రిలీజ్ చేయబోతున్నారు. 2 నిమిషాల 30 సెకన్ల పాటు సాగే ఈ ట్రైలర్‌పై ఆసక్తి నెలకొంది. ఇంతవరకూ కొన్ని పోస్టర్లు, ఓ చిన్న గ్లింప్స్ మాత్రమే రిలీజ్ చేశారు.

ట్రైలర్ వస్తే.. సినిమాపై ఓ అంచనాకి రావచ్చు. అత్యంత ప్రతిష్టాత్మకంగా రూపొందిన చిత్రమిది. విభిన్న గెటప్స్‌లో కమల్ హాసన్ కనిపించబోతున్నారు ఈ సినిమాలో. సిద్దార్ధ్, రకుల్ ప్రీత్ సింగ్, కాజల్ అగర్వాల్ ఈ సినిమాలో ఇతర కీలక పాత్రలు పోషిస్తున్నారు. జూలైలో సినిమా ప్రేక్షకుల ముందుకు రానుంది.