విశ్వ నటుడు కమల్‌హాసన్‌, ఆయన కుమార్తె శ్రుతిహాసన్‌ కలిసి లాస్‌ఏంజెల్స్‌లోని థియేటర్లో సరదాగా గడిపారు. కమల్‌ ప్రధాన పాత్రలో 'శభాష్‌ నాయుడు' చిత్రాన్ని తెరకెక్కిస్తున్న సంగతి తెలిసిందే. ఈ చిత్రం షూటింగ్‌ ప్రస్తుతం లాస్‌ఏంజెల్స్‌లో జరుగుతోంది. ఇందులో భాగంగా షూటింగ్‌ సెట్‌కు సమీపంలోని థియేటర్‌ను తన కుమార్తె శ్రుతిహాసన్‌తో కలిసి అలా సరదాగా చూడడానికి వెళ్లినట్లు కమల్‌హాసన్‌ తన ట్విట్టర్‌ ఖాతాలో ట్వీట్‌ చేశారు. దీంతోపాటు థియేటర్‌లో దిగిన కొన్ని ఫొటోలను అభిమానులతో పంచుకున్నారు. తెలుగు, తమిళం, హిందీ భాషల్లో ఏకకాలంలో తెరకెక్కిస్తున్న ఈ చిత్రంలో శ్రుతిహాసన్‌, రమ్యకృష్ణ, బ్రహ్మానందం తదితరులు ప్రధాన పాత్రల్లో నటిస్తున్నారు.