యూఏఈ: షార్జాలోని ఎమిరాటీలందరికీ ఉచిత ఆరోగ్య బీమా లభించే రోజు వస్తుందని షార్జా పాలకుడు, సుప్రీం కౌన్సిల్ సభ్యుడు షేక్ డాక్టర్ సుల్తాన్ బిన్ ముహమ్మద్ అల్ ఖాసిమి డైరెక్ట్ లైన్ రేడియో కార్యక్రమం ద్వారా నివాసితులకు హామీ ఇచ్చారు. షార్జా ప్రభుత్వం తన ఉద్యోగులు వారిపై ఆధారపడిన వారికి, అలాగే సీనియర్ ఎమిరేట్స్‌కు ఆరోగ్య బీమాను అందిస్తోంది.  కానీ ఈ కవరేజీని విస్తరించింది. 'వృద్ధుల కోసం బీమా' పథకం కోసం వయోపరిమితిని తగ్గించినట్టు షార్జా హెల్త్ అథారిటీ (SHA) ఇటీవల ప్రకటించింది.  ఇప్పుడు 45 ఏళ్ల వయస్సు వారికి బీమా అందించబడుతుందని, అయితే, అర్హత పొందాలంటే, వారు యూఏఈ పౌరులు, ఎమిరేట్ నివాసి అయి ఉండాలని SHA వైద్య బీమా విభాగంలో పనిచేస్తున్న డాక్టర్ మొహమ్మద్ ఫలాహ్ తెలిపారు. గతంలో, ప్రభుత్వ ప్రాయోజిత బీమాకు అర్హత పొందాలంటే సీనియర్ ఎమిరాటీకి కనీసం 50 ఏళ్లు ఉండాలి.  ఈ పథకంతో పాటు, ఉద్యోగులందరికీ తప్పనిసరి ఆరోగ్య బీమాను జనవరి 2025లో అమలు చేయడానికి షార్జా సిద్ధమవుతోంది. దుబాయ్, అబుదాబిలోని ఉద్యోగులందరూ ఇప్పటికే స్థానిక నిబంధనల ఆధారంగా మెడికల్ ఇన్సూరెన్స్ కవరేజీకి అర్హులు.  కాగా.. షార్జా, నార్తర్న్ ఎమిరేట్స్‌లో ఇది తొలిసారి అని పేర్కొన్నారు. ప్రాథమిక హెల్త్ ప్యాకేజీని అభివృద్ధి చేయడానికి స్థానిక ప్రభుత్వ అధికారులు.. అబుదాబి,  దుబాయ్‌లలో విధానాలను సమీక్షిస్తున్నారని నిపుణులు తెలిపారు.