ప్రస్తుత కాలంలో స్మార్ట్ ఫోన్ వాడని చిన్నపిల్లలు లేరు. చిన్నపిల్లలు మొబైల్ ఫోన్లకు ఎక్కువగా ఆకర్షితులవ్వడానికి ప్రధాన కారణాలు కొన్ని ఉన్నాయి. మొట్టమొదటిగా మొబైల్ ఫోన్లలో ఉన్న రంగుల, శబ్దాల, మరియు చలన చిత్రాల కారణంగా పిల్లలు వాటిని చూడటానికి ఆసక్తి చూపుతారు. ఇవి వారి దృష్టిని ఆకర్షిస్తాయి.

ఇంకా, మొబైల్ ఫోన్లలో గేమ్స్, యూట్యూబ్ వీడియోలు వంటి వినోదం అందుబాటులో ఉండటం వల్ల పిల్లలు వాటిని ఎక్కువగా ఉపయోగిస్తారు. తల్లిదండ్రులు కూడా పిల్లలను శాంతంగా ఉంచడానికి మొబైల్ ఫోన్లను ఇస్తారు.అలాగే, పిల్లలు పెద్దవాళ్లను చూసి అనుకరిస్తారు. పెద్దవాళ్లు మొబైల్ ఫోన్లను ఎక్కువగా ఉపయోగిస్తే, పిల్లలు కూడా వాటిని ఉపయోగించాలనుకుంటారు. ఇంతవరకు బాగానే ఉంటుంది కానీ ఆ తర్వాత అసలు సమస్య మొదలవుతుంది. ఎందుకంటే ఇది పిల్లల్లో క్రమక్రమంగా ఒక అడిక్షన్ లాగా మారుతుంది. కాలక్రమైనా ఇది సైబర్ బానిసత్వానికి దారి తీయొచ్చు. అయితే చిన్నపిల్లలను ఈ సెల్ ఫోన్ అడిక్షన్ నుంచి రక్షించడానికి ఎలాంటి చర్యలు తీసుకోవాలి అనేది తెలుసుకుందాం.

ప్రస్తుత కాలంలో సైబర్ బానిసత్వం అనేది నేటి సాంకేతిక యుగంలో చిన్న పిల్లలపై పెరుగుతున్న అతిపెద్ద సమస్య. ఈ సమస్యను నియంత్రించడానికి కొన్ని ముఖ్యమైన చర్యలు తీసుకోవాలి. మొదటగా, పిల్లలతో స్నేహపూర్వకంగా మాట్లాడటం చాలా ముఖ్యం. ఇంకా సైబర్ బానిసత్వం గురించి వారికి అవగాహన కల్పించడం చాలా ముఖ్యం. ఎందుకంటే వారు ఆన్‌లైన్‌లో ఉన్నప్పుడు జాగ్రత్తగా ఉండేలా చేయవచ్చు. ఇంకా పిల్లలు ఏవైనా సమస్యలు ఎదుర్కొంటే, వారు తల్లిదండ్రులకు లేదా ఉపాధ్యాయులకు చెప్పేలా ప్రోత్సహించాలి.ఇంకా, పిల్లల ఆన్‌లైన్ లో ఏ ఏ కార్యకలాపాలను పర్యవేక్షిస్తున్నారో తెలుసుకోవడం అవసరం. వారు ఏ వెబ్‌సైట్లు సందర్శిస్తున్నారో, ఏ యాప్‌లు వాడుతున్నారో తెలుసుకోవడం ద్వారా, అనవసరమైన కంటెంట్‌ను అడ్డుకోవచ్చు. ఈ క్రమంలో, పిల్లల గోప్యతను కూడా గౌరవించడం ముఖ్యం.

పిల్లలకు ఆన్‌లైన్‌లో సురక్షితంగా ఉండే పద్ధతులను నేర్పించడం కూడా అవసరం. ఉదాహరణకు, వ్యక్తిగత సమాచారాన్ని పంచుకోవద్దని, అనుమానాస్పద లింక్‌లను క్లిక్ చేయవద్దని వారికి చెప్పాలి.తల్లిదండ్రులు మరియు ఉపాధ్యాయులు సైబర్ భద్రత గురించి అవగాహన కలిగి ఉండాలి. సైబర్ నేరాల గురించి తాజా సమాచారం తెలుసుకోవడం ద్వారా, పిల్లలను సురక్షితంగా ఉంచే మార్గాలను అన్వేషించవచ్చు.
ముఖ్యంగా, పిల్లలకు ఆఫ్‌లైన్ కార్యకలాపాలకు ప్రాధాన్యత ఇవ్వడం ద్వారా, సైబర్ బానిసత్వాన్ని తగ్గించవచ్చు. ఆటలు, పుస్తకాలు చదవడం, సృజనాత్మక కార్యకలాపాలు వంటి వాటికి ప్రోత్సాహం ఇవ్వాలి. ఈ విధంగా, పిల్లల్లో సైబర్ బానిసత్వాన్ని నియంత్రించడం ద్వారా, వారు సురక్షితంగా మరియు ఆరోగ్యకరంగా పెరుగుతారు.

--వేణు పెరుమాళ్ల(మాగల్ఫ్ ప్రతినిధి)