యూఏఈ: యూఏఈలో డజనుకు పైగా వాటర్ డ్యామ్స్, నీటి కాలువలు నిర్మించనున్నారు. ఈ ప్రాజెక్టులకు యూఏఈ ఆమోదం తెలిపింది.  'యూఏఈ ప్రెసిడెంట్ చొరవ' కిందకు వచ్చే ఈ మెగా ప్లాన్.. వర్షపు నీటి సేకరణను పెంచడం, నీటి నిల్వ సామర్థ్యాన్ని 8 మిలియన్ క్యూబిక్ మీటర్లకు పెంచడం లక్ష్యంగా పెట్టుకుంది. వరదలను నివారించడం, కొన్ని నివాస ప్రాంతాలపై భారీ వర్షాల ప్రభావాన్ని తగ్గించడం లక్ష్యంగా పెట్టుకున్నట్లు అధికారులు తెలిపారు.  వివిధ ప్రాంతాలలో తొమ్మిది డ్యామ్‌లు,  తొమ్మిది నీటి కాలువలు 9 కిలోమీటర్ల మేర నిర్మించబడతాయని ప్రభుత్వం తన నివేదికలో తెలిపింది.ఇప్పటికే ఉన్న రెండు డ్యామ్‌ల విస్తరణను కూడా ప్లాన్ కవర్ చేస్తుందని పేర్కొన్నారు. 

ప్రాజెక్ట్ 13 నివాస ప్రాంతాలలో 19 నెలల్లో అమలు చేయనున్నారు. ఇవి:

షార్జా షిస్ ప్రాంతం, ఖోర్ఫక్కన్ సిటీ 

అజ్మాన్ మాస్ఫౌట్ ప్రాంతం

రాస్ అల్ ఖైమా షామ్, అల్ ఫహలిన్

ఫుజైరా మొహమ్మద్ బిన్ జాయెద్ సిటీ, అల్ హైల్, అల్ ఖరియా, కిద్ఫా, మార్బా, ధడ్నా, అల్ సీజీ, అల్ ఘజిమ్రి

ఈ సంవత్సరం ఏప్రిల్‌లో యూఏఈ..75 సంవత్సరాలలో చూడని అత్యంత భారీ వర్షపాతాన్ని చవిచూసింది. అనేక విమానాలు నిలిచిపోయాయి. ఇళ్లు, రహదారులను వరదలు ముంచెత్తాయి. కార్లు నీటిలో మునిగిపోయాయి.ఈ నేపథ్యంలో  ప్రెసిడెంట్ షేక్ మొహమ్మద్ దేశంలోని మౌలిక సదుపాయాలను క్షుణ్ణంగా అధ్యయనం చేయాలని ఆదేశించారు.