కావలసిన పదార్ధాలు
బియ్యం - కప్పు
పాలు - కప్పు
అరటిపండు - ఒకటి
బెల్లం తురుము - పావుకప్పు
కొబ్బరి తురుము - రెండు టేబుల్‌ స్పూన్లు
ఎండు కొబ్బరి ముక్కలు - నేతిలో వేయించినవి కొన్ని
యాలకులు - సరిపడా
తయారీ విధానం
ముందురోజు బియ్యాన్ని నానబెట్టుకొని, తర్వాతి రోజు మిక్సీ పట్టాలి. బియ్యం బాగా మెత్తగా నలిగాక దానిలో అరటిపండు వేసి మిక్సీ వెయ్యాలి. తరువాత బెల్లం తురుము, కొబ్బరి తురుము, యాలకులు కూడా వేసి బాగా మిక్సీ పట్టాలి దానిలో మధ్య మధ్యలో కాచి చల్లార్చిన పాలను పోస్తూ మెత్తగా దోసె పిండి కన్నా కొంచెం గట్టిగా రుబ్బుకోవాలి. ఇప్పుడు ఈ పిండిని ఒక గిన్నెలోకి తీసుకోవాలి. దీనిలోకి నేతిలో వేయించిన ఎండు కొబ్బరి ముక్కలు కలపాలి. ఇప్పుడు పొంగణాల పెనం పొయ్యి మీద పెట్టి దానికి నెయ్యిరాసి దానిమీద ఈ పిండిని చిన్న చిన్న పొంగణాలలా వేసి ఒకవైపు కాలాక తిరగేసి మళ్లీ నెయ్యి రాసి బాగా వేయించి తీసుకోవాలి. ఇలాగే మిగతా పిండిని కూడా చేసుకోవాలలి. అంతే వేడి వేడి పొంగణాలు రెడీ.

హెల్త్‌: ఉల్లి, వెల్లుల్లి రెండూ తల్లిలాంటివే
మనకి వంటింటిలో ఉల్లిపాయ ఉపయోగం ఎలాంటిదో అందరికీ తెలిసిందే. ఉల్లిపాయ లేని కూర రుచించదు. అందుకే ఉల్లిని ఉల్లి చేసిన మేలు తల్లి కూడా చేయదు అంటారు. అయితే ఈ మాట ఒక్క ఉల్లిపాయకే కాదు. వెల్లుల్లికి వర్తిస్తుంది. ప్రతీరోజూ ఉల్లి, వెల్లుల్లి పాయలు రెండూ ఎక్కువగా ఉపయోగించే వారికి, అస్సలు వీటిని ఉపయోగించని వారికి మధ్య తేడాను పరీక్షించి చూస్తే వాడని వారిలో ప్లేగు సంబంధిత కాన్సర్‌ రావడానికి అరవై శాతం ఎక్కువ అవకాశం ఉందని గుర్తించారట. వెల్లుల్లిలో సల్ఫర్‌, ఉల్లిలోని ఫ్లవనాయిడ్లూ అనేక రకాల కాన్సర్‌ నివారణ కారకాలుగా పని చేస్తాయట. ఇవి శరీరంలో ఎక్కడా కణితులు రాకుండా చెయ్యడం వల్ల తద్వారా వచ్చే కాన్సర్‌ను అదుపులో ఉంచడానికి తోడ్పడుతాయి. అంతే కాదు మన పెద్దవాళ్లు బాలింతలకు ఖచ్చితంగా తమ ఆహారంలో పత్యంగా వెల్లుల్లిని వాడతారు. తద్వారా ఆ సమయంలో వచ్చే గర్భాశయ సంబంధిత సమస్యలు రాకుండా ఉండడానికి ఇవి ఎంతో తోడ్పడుతాయి. అంతే కాదు మూత్రపిండాలను శుద్ధి చేసి, శరీరంలో బాక్టీరియాలాంటి సూక్ష్మ క్రిములు చేరకుండా కూడా అడ్డుకుంటాయి. అందుకే ఖచ్చితంగా ప్రతిరోజూ ఉల్లి, వెల్లుల్లిని వాడేలా చూసుకుంటే మంచిది.