వెండితెర దృశ్యకావ్యంగా బాహుబలి సినిమాను తెరకెక్కించి జాతీయంగా, అంతర్జాతీయంగా దర్శకుడు రాజమౌళి పేరు ప్రఖ్యాతలు తెచ్చుకున్నారు. ఈ సినిమాకుగాను జాతీయ అవార్డు అందుకున్న రాజమౌళి ఐఏఎన్ఎస్ వార్తాసంస్థకు ఓ ప్రత్యేక ఇంటర్వ్యూ ఇచ్చారు.బాహుబలి సినిమాను ఎందుకు నేరుగా హిందీలో తెరకెక్కించలేదన్న ప్రశ్నకు ఆయన స్పందిస్తూ.. 'బాహుబలి: ద బిగినింగ్ ప్రాజెక్టును ప్రారంభించినప్పుడు నా చేతిలో స్క్రిప్ట్ తోపాటు షెడ్యూల్ కూడా రెడీగా ఉంది. ఈ సినిమా కోసం ఎంతలేదన్న రెండేళ్లు డేట్స్ ఇచ్చే స్టార్లు కావాలని మాకు తెలుసు. రెండేళ్లపాటు ఎలాంటి కమిట్ మెంట్స్ లేకుండా బాలీవుడ్ లో ఎవరైనా డేట్స్ ఇవ్వగలరా? బాలీవుడ్ స్టార్లను పెట్టుకొని ఉంటే ఈ సినిమా వచ్చేది కాదు' అని చెప్పారు. ప్రతి సినిమాను పలు భాషల్లో విడుదల చేయాల్సిన అవసరముందా అన్న ప్రశ్నకు.. ' ప్రతి సినిమాను అన్ని భాషల్లో విడుదల చేయలేం. కుల,మత, జాతి, భాషలకు అతీతంగా అందరికీ వర్తించే మానవ భావోద్వేగాలు ఉన్న కథతో సినిమా తీసినప్పుడు దానిని అన్ని భాషల్లో విడుదల చేయవచ్చు' అని పేర్కొన్నారు. సగటు కథలతో తీసే సినిమాలను థియేటర్ల వద్ద పెద్దగా సందడి చేయబోవని ఆయన అభిప్రాయపడ్డారు. చారిత్రక కథనంతో తెరకెక్కిన బాహుబలి సినిమా ప్రపంచవ్యాప్తంగా రూ. 600 కోట్లకుపైగా వసూళ్లు రాబట్టిన సంగతి తెలిసిందే.