యూఏఈ: 2025, జనవరి నుండి యూఏఈలో ఉన్న ఉద్యోగులు, గృహ కార్మికులు ఆరోగ్య బీమా పథకం కిందకు వస్తారు. జనవరి 1 నుండి షార్జా, అజ్మాన్, ఉమ్ అల్ క్వైన్, రస్ అల్ ఖైమా, ఫుజైరాలోని యజమానులు రెసిడెన్సీ పర్మిట్‌లను జారీ చేయడానికి లేదా పునరుద్ధరించడానికి ముందుగా తమ ఉద్యోగులకు ఆరోగ్య బీమా పాలసీని పొందవలసి ఉంటుంది. కాగా, అబుదాబి, దుబాయ్ గతంలో ఇలాంటి విధానాలను అమలు చేశాయి. మానవ వనరులు మరియు ఎమిరేటైజేషన్ మంత్రిత్వ శాఖ (MoHRE) విడుదల చేసిన ప్రకటన ప్రకారం.. ఈ తప్పనిసరి బీమా పథకం కుటుంబ సభ్యులకు కూడా వర్తిస్తుందని పరిశ్రమ అధికారులు భావిస్తున్నారు. ఉద్యోగులు తమ కుటుంబాలను బీమా పథకం కిందకు తీసుకురావాలి, ఎందుకంటే కంపెనీలు ఉద్యోగులకు మాత్రమే బీమాను పొందవలసి ఉంటుంది.

పాలసీబజార్ సీఈఓ నీరజ్ గుప్తా మాట్లాడుతూ.. ఉద్యోగులపై ఆధారపడినవారు, కుటుంబాల వీసా ప్రక్రియ సమయంలో స్పాన్సర్‌లకు ఆరోగ్య బీమా అవసరం అవుతుంది. "ఇది చాలా పోటీ ధరలో మంచి చొరవ, ఇది ఖచ్చితంగా ప్రజలు ఆరోగ్య కవరేజీని పొందడంలో సహాయపడుతుంది," అని అన్నారు.  ఇన్సూరెన్స్ మార్కెట్ పోర్టల్ చీఫ్ మార్కెటింగ్ ఆఫీసర్ హితేష్ మోత్వాని మాట్లాడుతూ.. కొత్త విధానం దుబాయ్, అబుదాబిలో ఇప్పటికే అమల్లో ఉన్నదాని ప్రయారం ఉంటుందన్నారు. స్పాన్సర్‌లు వారి కుటుంబాలు, వారిపై ఆధారపడిన వారి ఆరోగ్య బీమాను ఏర్పాటు చేయవలసి ఉంటుందని పేర్కొన్నారు.   

ఇదిలా ఉండగా, ప్రాథమిక ఆరోగ్య బీమా ప్యాకేజీ సంవత్సరానికి 320 దిర్హామ్‌ల నుండి ప్రారంభమవుతుందని మంత్రిత్వ శాఖ తెలిపింది. ప్రాథమిక బీమా పథకం కింద దీర్ఘకాలిక వ్యాధులతో బాధపడుతున్న కార్మికులకు వెయిటింగ్ పీరియడ్ ఉండదని, ఇది ఒకటి నుండి 64 సంవత్సరాల వయస్సు గల వ్యక్తులను కవర్ చేస్తుందన్నారు. అయితే ఈ వయస్సు ఉన్నవారు తప్పనిసరిగా మెడికల్ డిస్‌క్లోజర్ ఫారమ్‌ను పూర్తి చేయాలని, ఇటీవలి వైద్య నివేదికలను జతచేయాలని తెలిపారు.

ఇన్‌పేషెంట్ కేర్ (అంటే వైద్య చికిత్స లేదా శస్త్రచికిత్సల కోసం ఆసుపత్రిలో చేరిన రోగులు) కోసం 20 శాతం సహ-చెల్లింపుతో చికిత్స ఖర్చులను ప్యాకేజీ కవర్ చేస్తుంది. బీమా చేయబడిన వ్యక్తి మందులతో సహా వార్షిక పరిమితి Dh1,000తో ప్రతి సందర్శనకు గరిష్టంగా Dh500 చెల్లిస్తారు. ఈ పరిమితులను దాటి, బీమా కంపెనీ 100 శాతం చికిత్స ఖర్చులను కవర్ చేస్తుంది. ఇక ఔట్ పేషెంట్ కేర్ విషయానికొస్తే (వైద్య సందర్శనలు, రోగనిర్ధారణ పరీక్షలు లేదా ఆసుపత్రిలో ఉండాల్సిన అవసరం లేని చిన్న విధానాలు అవసరమయ్యే రోగులు), సహ-చెల్లింపు 25 శాతం, ఇక్కడ బీమా చేసిన వ్యక్తి ప్రతి సందర్శనకు గరిష్టంగా Dh100 చెల్లిస్తారు. ఏడు రోజులలోపు తదుపరి సందర్శనల కోసం సహ-చెల్లింపు అవసరం లేదు. అయితే మందుల కోసం సహ-చెల్లింపులు 30 శాతానికి పరిమితం ఛేశారు.