ఇండోనేషియాలోని బాలి ద్వీపం సమీపంలో ఒక ఫెర్రీ మునిగిపోవడంతో సముద్రంలో తప్పిపోయిన 38 మంది కోసం రెస్క్యూ టీమ్ వెతుకుతున్నారు. మరో నలుగురు మరణించగా, 23 మందిని రక్షించినట్లు సురబయ సెర్చ్ అండ్ రెస్క్యూ ఏజెన్సీ తెలిపింది. బుధవారం రాత్రి తూర్పు జావాలోని కేతాపాంగ్ ఓడరేవు నుండి బయలుదేరిన దాదాపు అరగంట తర్వాత KMP తును ప్రతమా జయ మునిగిపోయిందని నేషనల్ సెర్చ్ అండ్ రెస్క్యూ ఏజెన్సీ ఒక ప్రకటనలో తెలిపింది. ఇది బాలిలోని గిలిమనుక్ ఓడరేవుకు 50 కిలోమీటర్ల దూరం ప్రయాణించాల్సి ఉంది. ఈ ఫెర్రీలో 53 మంది ప్రయాణికులు, 12 మంది సిబ్బంది, 14 ట్రక్కులు సహా 22 వాహనాలు ఉన్నాయని తెలిపింది. రాత్రిపూట చీకటిలో 2 మీటర్లు (6.5 అడుగులు) ఎత్తుకు ఎగసిన అలలతో పోరాడుతూ, రెండు టగ్ బోట్లు సహా తొమ్మిది పడవలు తప్పిపోయిన వ్యక్తుల కోసం వెతుకుతున్నాయి. 17,000 కంటే ఎక్కువ దీవులతో కూడిన ద్వీపసమూహం అయిన ఇండోనేషియాలో ఫెర్రీ విషాదాలు సర్వసాధారణం.