అబుధాబి: క్రికెట్ అభిమానులు ఎంతో ఆసక్తిగా ఎదురుచూస్తున్న ఆసియా కప్ 2025 (Asia Cup 2025) సందడి ప్రారంభమైంది. టీ20 ప్రపంచకప్ ముందు జరుగుతున్న ఈ మెగా టోర్నమెంట్, ఈ రోజు నుంచి యూఏఈ వేదికగా మొదలైంది. గతసారి విజేతగా నిలిచిన టీమిండియా మరోసారి టైటిల్ గెలుచుకోవాలని సంకల్పంతో బరిలోకి దిగుతోంది.

ఎనిమిది జట్లు, రెండు గ్రూపులు
ఈసారి టోర్నమెంట్‌లో మొత్తం ఎనిమిది జట్లు పోటీపడుతున్నాయి. వీటిని రెండు గ్రూపులుగా విభజించారు.

గ్రూప్-ఏ: భారత్, పాకిస్థాన్, యూఏఈ, ఒమన్
గ్రూప్-బీ: శ్రీలంక, బంగ్లాదేశ్, ఆఫ్ఘనిస్థాన్, హాంకాంగ్

ఈ జట్లు సూపర్-ఫోర్ దశకు చేరేందుకు తీవ్రంగా తలపడనున్నాయి. ముఖ్యంగా భారత్, పాకిస్థాన్ మ్యాచ్‌పై అభిమానుల దృష్టి ఎక్కువగా ఉంది.

టోర్నమెంట్‌లో భాగంగా తొలి మ్యాచ్ ఈ రోజు అబుదాబి వేదికగా ఆఫ్ఘనిస్థాన్, హాంకాంగ్ మధ్య జరుగుతుంది. భారత జట్టు రేపు యూఏఈతో తన మొదటి పోరును ఆడనుంది. ఇక అభిమానులంతా ఎదురుచూస్తున్న భారత్–పాకిస్థాన్ హై వోల్టేజ్ మ్యాచ్ ఈ నెల 14న జరగనుంది.భారత క్రికెట్ అభిమానులను దృష్టిలో ఉంచుకుని దాదాపు అన్ని మ్యాచ్‌లను రాత్రి 8 గంటలకు ప్రారంభించేలా షెడ్యూల్ రూపొందించారు. సెప్టెంబర్ 28న దుబాయ్‌లో జరగనున్న ఫైనల్ మ్యాచ్‌తో ఈ మెగా టోర్నీ ముగియనుంది.ఈసారి టోర్నీ విజేతలకు భారీ బహుమతులు సిద్ధంగా ఉన్నాయి. గత ఎడిషన్‌తో పోలిస్తే 50 శాతం పెంచి, విజేత జట్టుకు రూ.2.6 కోట్లు, రన్నరప్ జట్టుకు రూ.1.3 కోట్లు అందజేయనున్నారు. దీంతో జట్ల మధ్య పోటీ మరింత రసవత్తరంగా మారనుంది.ఆసియా కప్ 2025 ప్రసార హక్కులను సోనీ స్పోర్ట్స్ నెట్‌వర్క్ దక్కించుకుంది. మ్యాచ్‌లు టీవీతో పాటు డిజిటల్‌గా సోనీలివ్ యాప్ మరియు వెబ్‌సైట్‌లో ప్రత్యక్ష ప్రసారం కానున్నాయి. దీంతో అభిమానులు ఎక్కడున్నా మ్యాచ్‌లను వీక్షించే అవకాశం ఉంది.

ప్రధాన ఆటగాళ్లు: సూర్యకుమార్ యాదవ్ (కెప్టెన్), శుభమన్ గిల్ (వైస్ కెప్టెన్), హార్దిక్ పాండ్యా, జస్ప్రీత్ బుమ్రా, కుల్దీప్ యాదవ్, సంజు శాంసన్, రింకూ సింగ్.

ఆల్‌రౌండర్లు: అభిషేక్ శర్మ, తిలక్ వర్మ, శివమ్ దుబే, అక్షర్ పటేల్.
రిజర్వ్ ప్లేయర్లు: ప్రసిద్ధ్ కృష్ణ, వాషింగ్టన్ సుందర్, రియాన్ పరాగ్, ధ్రువ్ జురెల్, యశస్వి జైస్వాల్.

ఆసియా కప్ ప్రారంభం కావడంతో అభిమానుల్లో ఉత్సాహం ఉప్పొంగుతోంది. ముఖ్యంగా భారత్–పాకిస్థాన్ పోరును ప్రత్యక్షంగా చూసేందుకు టిక్కెట్ల కోసం అభిమానులు పోటీ పడుతున్నారు. టోర్నమెంట్ అంతా ఉత్కంఠ, ఉత్సాహం నింపబోతుందని క్రికెట్ ప్రేమికులు ఆశిస్తున్నారు.