కొడుకు పుట్టాలని కోరుకుంటూ ఓ వ్యక్తి తన ఇంటిపై పాకిస్థాన్ జెండా ఎగరేశాడు. విషయం తెలుసుకున్న పోలీసులు ఆ జెండాను తొలగించి, జెండా ఎగరేసిన అన్వరుల్ హక్‌ను అరెస్ట్ చేశారు. బీహార్‌ రాష్ట్రంలోని నలంద జిల్లాలో ఈ ఘటన జరిగింది. లోకల్ టీవీ ఒకటి అన్వరుల్ ఇంటిపై ఎగురుతున్న పాక్ జెండాను చూపించడంతో జిల్లా అధికారులు వెంటనే రంగంలోకి దిగారు. పాక్ జెండాను తానే ఎగరేశానని, అలా చేస్తే తన భార్యకు కొడుకు పుడతాడన్న నమ్మకంతోనే ఇలా చేశానని పోలీసుల విచారణలో అన్వరుల్ అంగీకరించాడు. నలంద బీహార్ ముఖ్యమంత్రి నితీశ్ కుమార్ సొంత జిల్లా. అందులోనూ ఈ మధ్యే పాట్నాలో కొందరు పాకిస్థాన్‌కు అనుకూలంగా నినాదాలు చేసిన నేపథ్యంలో ఈ ఘటన జరగడం ప్రాధాన్యం సంతరించుకుంది.