మహారాష్ట్రలోని థానే జిల్లాలో ఇస్లామిక్ స్టేట్ (ఐఎస్) అనుమానిత ఉగ్రవాదిని పోలీసులు శనివారంనాడు అరెస్టు చేశారు. కేరళ పోలీసులు, మహారాష్ట్ర ఉగ్రవాద నిరోధక దళం సంయుక్తంగా చేప్టటిన గాలింపు చర్యల్లో ఈ ఉగ్రవాది పట్టుబట్టాడు. అతనిని మహారాష్ట్రలోని పర్భణి జిల్లాకు చెందిన వ్యక్తిగా గుర్తించారు. సిరియాలోని ఐఎస్ దళాల్లో పనిచేస్తున్న వాంటెడ్ క్రిమినల్ ఫరూక్‌తో సమాచార సంబంధాల కలిగి ఉన్నట్టు తెలుస్తోంది. ఈనెల మొదట్లో కూడా మహారాష్ట్ర యాంటీ టెర్రరిజం స్క్వాడ్ జరిపిన గాలింపుల్లో ఐఎస్‌ సభ్యులతో ఎప్పటికప్పుడు టచ్‌లో ఉన్నట్టు అనుమానిస్తున్న 31 ఏళ్ల వ్యక్తిని అరెస్టు చేశారు. జూన్ 29న హైదరాబాద్‌ పాతబస్తీలోని పది ప్రాంతాల్లో గాలింపులు జరిపిన జాతీయ దర్యాప్తు సంస్థ (ఎన్ఐఏ) 11 మంది యువకులను నిర్బంధంలోకి తీసుకుంది. ఆ మరుసటి రోజే ఇండియాలో టెర్రరిస్టు దాడులకు ఐఎస్‌ నుంచి ఆదేశాలు అందుకున్నట్టుగా అనుమానిస్తున్న ఐదుగురిని అరెస్టు చేసినట్టు ఎన్ఐఏ ప్రకటించింది.