న్యూ ఢిల్లీ: భారత రూపాయి బుధవారం డాలర్‌ మారక విలువలో మరోసారి పడిపోయి, చరిత్రలో తొలిసారిగా రూ.90 మార్క్‌ను దాటింది. ఆసియా ప్రాంతంలో ఈ ఏడాది అత్యంత బలహీనంగా మారిన కరెన్సీల్లో రూపాయి ముందంజలో నిలిచింది. రూపాయి పతనం కొత్త విషయం కాకపోయినా, దాని ప్రభావం దేశ ఆర్థిక వ్యవస్థపైనా, సాధారణ ప్రజల జీవితాలపైనా గణనీయంగా కనిపిస్తుంది. దిగుమతులు, ఎగుమతులు, విదేశీ విద్య, ఇంధన ధరలు వంటి అనేక రంగాల్లో దీని ప్రతిఫలం స్పష్టంగా కనిపిస్తుంది.

ఏం కారణంగా రూపాయి క్షీణిస్తోంది?
విదేశీ పెట్టుబడుల ఉపసంహరణ: ఈ ఏడాది ఇప్పటివరకు FPIలు 17 బిలియన్ డాలర్ల(Dollar)కు పైగా నిధులను భారత్ నుంచి వెనక్కి తీసుకున్నారు. దీని ప్రభావం రూపాయి విలువపై పడింది.
రికార్డు స్థాయి వాణిజ్య లోటు: అక్టోబర్ నెలలో వాణిజ్య లోటు 41.7 బిలియన్ డాలర్లకు చేరుకోవడం రూపాయి డిమాండ్‌ను బలహీనపరచింది.
అంతర్జాతీయ ఉద్రిక్తతలు: భారత్–అమెరికా వాణిజ్య ఒప్పందం ఆలస్యం, ప్రపంచ వ్యాప్తంగా ఉన్న ఆర్థిక–రాజకీయ అనిశ్చితి కూడా రూపాయిపై ఒత్తిడిని పెంచాయి.

రూపాయి పతనం వల్ల నష్టపోయే రంగాలు
చమురు దిగుమతి
భారతదేశం ఎక్కువ మోతాదులో ముడి చమురును దిగుమతి చేసుకుంటుంది. రూపాయి బలహీనమైతే చమురు కొనుగోలుకు మరింత రూపాయలు అవసరమవుతాయి, దీంతో దేశ ఆర్థిక భారం పెరుగుతుంది.

ఎరువులు
ఎరువుల దిగుమతికి ఖర్చు పెరగడం వల్ల ప్రభుత్వ సబ్సిడీ వృద్ధి చెందుతుంది. వ్యవసాయ రంగంలో అదనపు ఒత్తిడి పడే అవకాశం ఉంది.

విదేశీ విద్య
డాలర్లలో ఫీజులు చెల్లించే విద్యార్థులకు ఖర్చు మరింత పెరుగుతుంది. విద్యారుణాల EMIలు కూడా అధికమవుతాయి.

బంగారం–వెండి దిగుమతులు
రూపాయి బలహీనత వల్ల నగలు మరింత ఖరీదైనవిగా మారతాయి. భారతదేశం విస్తృతంగా బంగారం దిగుమతి చేస్తుండటంతో ఇది వినియోగదారులపై ప్రత్యక్ష ప్రభావం చూపిస్తుంది.

ఎలక్ట్రానిక్స్ & వాహనాల రంగం
స్మార్ట్‌ఫోన్‌లు, ల్యాప్‌టాప్‌లు, ఏసీలు, కార్లలోని అనేక ప్రధాన విడిభాగాలు విదేశాల నుంచే వస్తాయి. రూపాయి పడిపోవడంతో ఉత్పత్తి వ్యయం పెరిగి ధరలు కూడా అధికమవుతాయి.

ఎయిర్‌లైన్స్
విమానాల లీజు చార్జీలు, ఇంధన వ్యయం అన్నీ డాలర్లలో ఉంటాయి. రూపాయి బలహీన పడితే విమాన ప్రయాణం ఖరీదవుతుంది.

విదేశీ రుణాలు
డాలర్లలో అప్పులు తీసుకున్న సంస్థలు ఎక్కువ రూపాయలు చెల్లించాల్సి రావడం వల్ల వారి ఆర్థికభారం పెరుగుతుంది.

రూపాయి పతనం వల్ల లాభపడే రంగాలు
ఐటీ & ఫార్మా రంగాలు
ఈ రంగాలు వారి ఆదాయంలో పెద్ద భాగం డాలర్లలో సంపాదిస్తాయి. రూపాయి(Indian Rupee Fall) విలువ తగ్గితే ఆ డాలర్ల విలువ రూపాయల్లో ఎక్కువగా మారుతుంది. దీంతో లాభాలు పెరుగుతాయి.

ఎగుమతిదారులు
రూపాయి బలహీనమైతే భారతీయ వస్తువుల ధరలు అంతర్జాతీయ మార్కెట్లో చౌకగా మారి పోటీతత్వాన్ని పెంచుతాయి. ఇది ఎగుమతులకు అనుకూలం.

NRI మనీ ఫ్లో
విదేశాల నుంచి డబ్బు పంపించే వారికి ఎక్కువ రూపాయలు లభిస్తాయి. ఇది దేశానికి విదేశీ కరెన్సీ ప్రవాహాన్ని పెంచడంలో సహాయపడుతుంది.

షేర్ మార్కెట్ & ద్రవ్యోల్బణంపై ప్రభావం
మార్కెట్ అస్థిరత: రూపాయి పతనం కారణంగా విదేశీ పెట్టుబడిదారులు జాగ్రత్తగా వ్యవహరిస్తారు. ఇది మార్కెట్‌లో అనిశ్చితిని పెంచుతుంది.
ద్రవ్యోల్బణం: దిగుమతి అయ్యే వస్తువుల ధరలు పెరగడం వల్ల ద్రవ్యోల్బణం పెరగవచ్చు. అయితే ప్రస్తుతానికి రిటైల్ ద్రవ్యోల్బణం 0.25% వద్ద ఉండటం కొంత ఉపశమనం ఇస్తోంది.