3డీ సినిమాలను థియేటర్లో చూడాలంటే 3డీ కళ్లద్దాలు తప్పనిసరి. అయితే చాలా మంది వాడటంతో వీటిపై గీతలు, మరకలు పడుతూ ఉంటాయి. ఈ కారణంగా వీటిని పెట్టుకొని సినిమా చూడటం కొందరికి ఇబ్బందిగా ఉంటుంది. అయితే ఇలాంటి సమస్యలకు చెక్‌ పెట్టే విధంగా తొలిసారిగా గ్లాసెస్‌ లెస్‌ 3డీ డిస్‌ప్లే సాంకేతికతను రూపొందించారు ఎంఐటీ కంప్యూటర్‌ సైన్స్‌ పరిశోధకులు. ఈ సాంకేతికతతో థియేటర్లో ఎక్కడ కూర్చున్నా కళ్లద్దాలు పెట్టుకోకుండానే 3డీ అనుభూతిని పొందవచ్చు.
ఇప్పటికే గ్లాసెస్‌ ధరించకుండా 3డీ చిత్రాలను వీక్షించే సాంకేతికత కొంత అందుబాటులో ఉంది. అయితే సింగిల్‌ యూజర్‌ను దృష్టిలో ఉంచుకొని దీనిని రూపొందించారు. ఇందులో అతను తెరను చూసే దృష్టి కోణం మారదు. అయితే సినిమా థియేటర్లో వందల మంది ప్రేక్షకులు వివిధ సీట్లలో కూర్చొని వివిధ కోణాల్లో సినిమా చూడటానికి ఇలాంటివి పనిచేయవు.
ఎంఐటీ కంప్యూటర్‌ సైన్స్‌ అండ్‌ ఆర్టిఫిషియల్‌ ఇంటెలిజెన్స్‌ ల్యాబ్‌(సీఎస్‌ఏఎల్‌) శాస్త్రవేత్తలు తొలిసారిగా థియేటర్లో 3డీ గ్లాసెస్‌ అవసరం లేకుండానే 3డీ సినిమా చూసే వీలున్న తెరను రూపొందించారు. 'సినిమా 3డీ' అని పిలిచే ఈ తెరపై ప్రత్యేకంగా అమర్చిన ఆప్టిక్స్‌, లెన్స్‌లు, అద్దాలు ఉంటాయి. ఈ సిస్టమ్‌ థియేటర్‌లో కూర్చొన్న ప్రేక్షకులకు అన్ని కోణాల్లో దృశ్యాన్ని చేరవేసి 3డీ అనుభూతిని కలిగిస్తుంది. అయితే గ్లాసెస్‌ లెస్‌ 3డీ సిస్టమ్‌ ఇంకా అభివృద్ధి దశలోనే ఉందని.. ఓ నమూనాను తయారు చేసి పరిశోధనలు చేస్తున్నామనిపరిశోధకులు తెలిపారు.