న్యూ ఢిల్లీ: అసంఘటిత రంగంలో పనిచేసే కోట్లాది మంది కార్మికులకు వృద్ధాప్య భద్రత కల్పిస్తున్న Atal Pension Yojana (APY) పథకాన్ని కేంద్ర ప్రభుత్వం మరికొన్ని సంవత్సరాలు పొడిగించింది. Narendra Modi అధ్యక్షతన జరిగిన కేంద్ర మంత్రివర్గ సమావేశంలో ఈ పథకాన్ని 2030–31 ఆర్థిక సంవత్సరం వరకు కొనసాగించేందుకు ఆమోదం తెలిపింది. ఈ స్కీమ్‌పై ప్రజల్లో అవగాహన పెంచేందుకు చేపట్టే ప్రచార కార్యక్రమాలకు అవసరమైన నిధుల మద్దతును కూడా కొనసాగించాలని కేబినెట్ నిర్ణయించింది.

2015 మే 9న ప్రారంభమైన అటల్ పెన్షన్ యోజన (Atal Pension Yojana extension) అసంఘటిత రంగ కార్మికులకు వృద్ధాప్యంలో స్థిరమైన ఆదాయం అందించడమే లక్ష్యంగా రూపొందింది. ఈ పథకంలో చేరిన వారు చెల్లించే నెలవారీ చందాను బట్టి, 60 ఏళ్లు నిండిన తర్వాత నెలకు రూ.1,000 నుంచి రూ.5,000 వరకు కనీస గ్యారెంటీ పెన్షన్ లభిస్తుంది. దేశంలో పెన్షన్ కవరేజ్‌ను విస్తరించడం, ఆర్థిక చేరికను బలోపేతం చేయడం, ‘వికసిత భారత్ @2047’ లక్ష్య సాధనకు ఈ పథకం కీలకంగా నిలుస్తుందని కేంద్ర ప్రభుత్వం పేర్కొంది.

తాజా గణాంకాల ప్రకారం, 2026 జనవరి 19 నాటికి ఈ పథకంలో 8.66 కోట్లకు పైగా చందాదారులు చేరారు. అమలులో ప్రభుత్వ రంగ బ్యాంకులు కీలక పాత్ర పోషిస్తున్నాయి. మొత్తం నమోదుల్లో 70.44 శాతం వాటా ప్రభుత్వ బ్యాంకులదే. అలాగే, గత ఆర్థిక సంవత్సరం (2023–24) ముగింపు నాటికి కొత్తగా చేరే వారి సంఖ్యలో 24 శాతం వృద్ధి నమోదవడం ఈ పథకానికి ఉన్న ఆదరణను స్పష్టం చేస్తోంది.