అజ్మాన్ 'అబ్రా'కు పెరిగిన క్రేజ్

- January 31, 2026 , by Maagulf

$అజ్మాన్ \'అబ్రా\'కు పెరిగిన క్రేజ్$

అజ్మాన్: ఆధునిక రవాణా సౌకర్యాలు ఎన్ని ఉన్నా, సాంప్రదాయ పడవలపై ప్రయాణించే మజానే వేరు. అజ్మాన్ ఎమిరేట్లోని 'అబ్రా' (Abra) మారిటైమ్ రవాణా సేవలకు పర్యాటకులు మరియు స్థానికుల నుంచి భారీ స్పందన లభిస్తోంది. గతేడాది ఏకంగా 55,872 మంది ప్రయాణికులు ఈ సేవలను వినియోగించుకున్నట్లు అజ్మాన్ ట్రాన్స్పోర్ట్ అథారిటీ తాజాగా వెల్లడించింది.

కీలక ప్రాంతాలను అనుసంధానిస్తూ..

ప్రస్తుతం అజ్మాన్ అబ్రా నెట్వర్క్ నగరం లోని ముఖ్యమైన నివాస, వాణిజ్య మరియు పర్యాటక ప్రాంతాలను కలుపుతూ నాలుగు ప్రధాన స్టేషన్ల ద్వారా నడుస్తోంది:

1. అల్ జోరా స్టేషన్ (Al Zorah Station)

2. అల్ రషీదియా స్టేషన్: అజ్మాన్ ఫిష్ మార్కెట్ సమీపంలో.

3. అల్ సఫియా స్టేషన్: ముషైరిఫ్ ప్రాంతంలోని ఫిషర్మెన్ అసోసియేషన్ కౌన్సిల్ వద్ద.

4. మెరీనా స్టేషన్: అజ్మాన్ కార్నిచ్ మరియు అజ్మాన్ మెరీనాకు ఆనుకొని.

వారసత్వానికి చిహ్నం

అజ్మాన్ ట్రాన్స్పోర్ట్ అథారిటీ ఎగ్జిక్యూటివ్ డైరెక్టర్ ఇంజనీర్ సామీ అలీ అల్ జల్లాఫ్ మాట్లాడుతూ, అబ్రా సేవలు కేవలం రవాణా మార్గమే కాకుండా, యూఏఈ సముద్రయాన వారసత్వానికి మరియు సాంప్రదాయ గుర్తింపునకు చిహ్నమని పేర్కొన్నారు.

"అబ్రా ప్రయాణం ప్రయాణికులకు ఒక ప్రత్యేకమైన, సురక్షితమైన మరియు ఆహ్లాదకరమైన అనుభూతిని అందిస్తుంది. మా సంప్రదాయాన్ని గౌరవిస్తూనే, అత్యాధునిక రవాణా వ్యవస్థను బలోపేతం చేయడమే మా లక్ష్యం." — ఇంజనీర్ సామీ అలీ అల్ జల్లాఫ్

పర్యాటకానికి చేయూత

తక్కువ ఖర్చుతో కూడిన ప్రయాణం కావడంతో పాటు, సముద్రపు అందాలను వీక్షించే అవకాశం ఉండటంతో పర్యాటకులు అబ్రా ప్రయాణానికి మొగ్గు చూపుతున్నారు. భవిష్యత్తులో ఈ సేవలను మరింత అభివృద్ధి చేసి, ఆపరేషనల్ ఎఫిషియెన్సీని పెంచేందుకు అధికారులు ప్రణాళికలు సిద్ధం చేస్తున్నారు.

అజ్మాన్ పర్యటనకు వెళ్లే వారు ఇక్కడి అబ్రా ప్రయాణాన్ని తప్పక అనుభవించాల్సిందే. ఇది అటు పర్యాటక రంగ అభివృద్ధికి, ఇటు స్థానికుల సులభతర ప్రయాణానికి ఎంతగానో తోడ్పడుతోంది.

--బాజీ షేక్(యూఏఈ)