హైదరాబాద్: హైదరాబాద్‌లో వేసవి సెగలు ఒక్కసారిగా పెరిగాయి. శనివారం నగరంలో గరిష్ట ఉష్ణోగ్రత 38.2 డిగ్రీల సెల్సియస్‌గా నమోదవ్వగా, కనిష్ట ఉష్ణోగ్రత 24.6 డిగ్రీలుగా ఉంది. ముఖ్యంగా గాలిలో తేమ శాతం కేవలం 23% కి పడిపోవడంతో వాతావరణం పొడిగా మారి, నగరవాసులు ఉక్కపోతతో ఇబ్బంది పడుతున్నారు. ఆదివారం నాటికి ఈ ఉష్ణోగ్రతలు మరింత పెరిగి 39 డిగ్రీలకు చేరుతాయని వాతావరణ శాఖ హెచ్చరించింది.

వాతావరణ శాఖ అంచనాల ప్రకారం, మార్చి 30, 31 తేదీల్లో నగరంలో అక్కడక్కడా తేలికపాటి జల్లులు కురిసే అవకాశం ఉంది. అయితే, ఈ వర్షం కేవలం తాత్కాలిక ఉపశమనాన్ని మాత్రమే ఇస్తుందని, ఎండల తీవ్రత మాత్రం తగ్గదని నిపుణులు చెబుతున్నారు. వర్షం తర్వాత భూమి నుంచి వచ్చే ఆవిరి వల్ల ఉక్కపోత మరింత పెరిగే ప్రమాదం ఉంది.

41 డిగ్రీల వరకు..
నిజమైన వేసవి తాపం ఏప్రిల్ మొదటి వారం నుంచి మొదలుకానుంది. వచ్చే నెల ప్రారంభం నుంచే ఉష్ణోగ్రతలు 38 నుండి 41 డిగ్రీల మధ్య నమోదయ్యే సూచనలు కనిపిస్తున్నాయి. మధ్యాహ్నం 12 నుండి సాయంత్రం 4 గంటల వరకు అత్యవసరమైతే తప్ప బయటకు రావద్దని, తగిన జాగ్రత్తలు తీసుకోవాలని అధికారులు సూచిస్తున్నారు.