అమెరికా: ఇటలీ టెన్నిస్ స్టార్ జానిక్ సినర్ చరిత్ర పుటల్లో తన పేరును సువర్ణాక్షరాలతో లిఖించుకున్నాడు. మయామి ఓపెన్ ఫైనల్లో తన ఆధిపత్యాన్ని ప్రదర్శిస్తూ ప్రతిష్టాత్మకమైన ‘సన్‌షైన్ డబుల్’ (ఇండియన్ వెల్స్ మరియు మయామి ఓపెన్ రెండింటినీ ఒకే సీజన్‌లో గెలవడం) పూర్తి చేశాడు. హార్డ్-కోర్ట్ ఫైనల్లో జిరి లెహెక్కాను 6-4, 6-4 తేడాతో ఓడించిన సినర్, 2017లో రోజర్ ఫెడరర్ తర్వాత ఒకే సీజన్‌లో ఈ రెండు టోర్నీలను గెలుచుకున్న తొలి ఆటగాడిగా నిలిచాడు.

ఈ విజయంలో అత్యంత విశేషమైన అంశం ఏమిటంటే.. ఈ రెండు టోర్నమెంట్‌లలో సినర్ ఒక్క సెట్ కూడా కోల్పోకుండా ట్రోఫీలను ముద్దాడటం. టెన్నిస్ చరిత్రలో ఈ ఘనత సాధించిన మొట్టమొదటి ఆటగాడు సినర్ కావడం విశేషం. గతేడాది పారిస్ మాస్టర్స్ నుండి వరుసగా 34 సెట్లను గెలుచుకున్న ఆయన, ఈ సీజన్‌లో తన రికార్డును 19-2 కు మెరుగుపరుచుకున్నాడు. “మొదటిసారి సన్‌షైన్ డబుల్ గెలవడం నమ్మలేకపోతున్నాను. ఇది సాధించడం చాలా కష్టం, కానీ ఏదోలా సాధించాం, చాలా సంతోషంగా ఉంది” అని సినర్ పేర్కొన్నారు.

వర్షం కారణంగా 90 నిమిషాల ఆలస్యంగా ప్రారంభమైన ఫైనల్లో సినర్ మొదటి నుంచే పట్టు బిగించాడు. ఈ టోర్నీలో అంతకుముందు ఒక్కసారి కూడా తన సర్వీస్ కోల్పోని జిరి లెహెక్కాపై సినర్ ఒత్తిడి పెంచి బ్రేక్ పాయింట్లు సాధించాడు. లెహెక్కా పుంజుకునే ప్రయత్నం చేసినప్పటికీ, సినర్ తన అద్భుతమైన ఫస్ట్ సర్వ్‌లతో ప్రత్యర్థిని కట్టడి చేశాడు. గంటా 33 నిమిషాల పాటు సాగిన ఈ పోరులో సినర్ తన ఫోర్‌హ్యాండ్ షాట్లతో మ్యాచ్‌ను శాసించాడు.

ఈ అద్భుత విజయంతో జానిక్ సినర్ ఏటిపి (ATP) ర్యాంకింగ్స్‌లో అగ్రస్థానానికి మరింత చేరువయ్యాడు. ప్రస్తుతం ప్రపంచ నంబర్ వన్ కార్లోస్ అల్కరాస్ కంటే సినర్ కేవలం 1,190 పాయింట్లు మాత్రమే వెనుకబడి ఉన్నాడు. ఇదే ఫామ్‌ను కొనసాగిస్తే త్వరలోనే సినర్ ప్రపంచ నంబర్ వన్ పీఠాన్ని అధిరోహించే అవకాశం ఉందని విశ్లేషకులు భావిస్తున్నారు.