మనామా: సార్‌లో జరిగిన ఘోరమైన రోడ్డు ప్రమాదంలో భార్యాభర్తలు, వారి బిడ్డ మరణించగా, మరో ఇద్దరు పిల్లలు తీవ్రంగా గాయపడ్డారు. ఈ ఘటనకు బాధ్యుడైన నిందితుడికి విధించిన శిక్షను బహ్రెయిన్ కోర్ట్ ఆఫ్ కాసేషన్ సమర్థించింది. ఈ తీర్పును తుది తీర్పుగా ఖరారు చేసింది.

అప్పీల్ ప్రాసిక్యూషన్ విభాగాధిపతి మాట్లాడుతూ.. కోర్టు నిందితుడి అప్పీల్‌ను తిరస్కరించిందని, ట్రాఫిక్ నేరానికి గాను విధించిన ఆరేళ్ల జైలు శిక్షను, శిక్షాకాలం పూర్తయిన తర్వాత ఏడాది పాటు అతని డ్రైవింగ్ లైసెన్స్‌ను సస్పెండ్ చేయాలని, వాహనాన్ని జప్తు చేయాలని కోర్టు ఆదేశించిందని తెలిపారు.

కేసు వివరాల ప్రకారం, నిందితుడు మాదకద్రవ్యాలు, మద్యం సేవించి, చట్టబద్ధమైన పరిమితిని మించిన వేగంతో, ట్రాఫిక్ భద్రతా నియమాలను ఉల్లంఘించి వాహనం నడిపాడు. అతను ఎదురుగా వస్తున్న వాహనాల వైపు దూసుకెళ్లి, బాధితుల వాహనాన్ని ఢీకొట్టి ఈ ఘోర ప్రమాదానికి కారణమయ్యాడు. విచారణలో నిందితుడి నివాసం నుంచి పెద్ద మొత్తంలో మాదక ద్రవ్యాలను అధికారులు స్వాధీనం చేసుకుని, కేసు నమోదు చేశారు.   

దిగువ క్రిమినల్ కోర్టులు రెండు కేసులలో కలిపి నిందితుడికి మొత్తం తొమ్మిది సంవత్సరాల జైలు శిక్షతో పాటు 3,000 బహ్రెయిన్ దినార్ల జరిమానా, అతని డ్రైవింగ్ లైసెన్సు సస్పెన్షన్, మరియు వాహనం జప్తును విధించాయి. అప్పీలేట్ కోర్టు ఈ తీర్పులను సమర్థించింది.

నిందితుడు మాదక ద్రవ్యాల స్వాధీనానికి సంబంధించిన శిక్షను అంగీకరించినప్పటికీ, అతను ట్రాఫిక్ నేర నిర్ధారణను కోర్ట్ ఆఫ్ కాసేషన్‌లో సవాలు చేశాడు. ఆ కోర్టు చివరికి అప్పీల్‌ను కొట్టివేసి, దిగువ కోర్టు తీర్పును సమర్థించింది.