రియాద్: 2025లో సౌదీ అరేబియా వినోద రంగాన్ని సందర్శించిన వారి సంఖ్య 89 మిలియన్లను అధిగమించింది.ఈ మేరకు జనరల్ ఎంటర్‌టైన్‌మెంట్ అథారిటీ (GEA) వార్షిక నివేదికను విడుదల చేసింది.గత ఏడాది జారీ చేసిన మొత్తం లైసెన్సుల సంఖ్య 6,490కి చేరిందని అథారిటీ పేర్కొంది. 2024లో 422 వినోద కేంద్రాలకు లైసెన్సులు జారీ చేయగా, ఈ ఏడాది 472 కేంద్రాలకు లైసెన్సులు మంజూరు చేశారు.12 శాతం పెరుగుదల నమోదైంది. అలాగే, 2024లో 513గా ఉన్న యాక్టివ్ వినోద కేంద్రాల సంఖ్య, ప్రస్తుతం మొత్తం 975కి చేరింది.

నిబంధనల అమలును పటిష్టం చేయడం, సంబంధిత విధానాలను అభివృద్ధి చేయడం లక్ష్యంగా రూపొందించిన నియంత్రణ చట్రం పరిధిలో వినోద రంగం సాధించిన వృద్ధిని మరియు కార్యకలాపాలను ఈ గణాంకాలు ప్రతిబింబిస్తున్నాయని అధికారులు తెలిపారు.

2025 సంవత్సరంలో వినోద రంగం ఆధ్వర్యంలో 1,690 కార్యక్రమాలు (events) నిర్వహించారు. ఇవి మొత్తం 75,661 ఈవెంట్ రోజుల పాటు కొనసాగాయని, అలాగే ఈ రంగ కార్యకలాపాల్లో 6,778 కంపెనీలు పాల్గొన్నాయని నివేదిక వెల్లడించింది.

నిబంధనల అమలు మరియు అనుభవ నాణ్యత సూచికల పరంగా.. లైసెన్స్ పొందిన అన్ని కార్యకలాపాల్లో పెట్టుబడిదారులు GEA నిబంధనలను 92 శాతం మేరకు పాటించారని నివేదిక తెలిపింది. లైసెన్స్ పొందిన వినోద కార్యక్రమాల విషయంలో ఈ శాతం 95గా, లైసెన్స్ పొందిన వినోద కేంద్రాల విషయంలో 93 శాతంగా నమోదైంది. అంతేకాకుండా, వినోద ఎంపికల నాణ్యతలో ఈ రంగం 65 శాతం మెరుగుదల సాధించింది. అలాగే వివిధ వినోద సేవలకు సంబంధించి సందర్శకుల సంతృప్తిని అంచనా వేయడంలో 74 శాతం కవరేజీని సాధించింది.

సౌదీ విజన్ 2030 లక్ష్యాలకు అనుగుణంగా ఆర్థిక వ్యవస్థను వైవిధ్యపరచడం, జీవన నాణ్యతను మెరుగుపరచడం,ఆశాజనక రంగాలను అభివృద్ధి చేయడం ద్వారా ప్రపంచ వినోద గమ్యస్థానంగా సౌదీ అరేబియా స్థానాన్ని బలోపేతం చేస్తుందని నివేదిక స్పష్టం చేసింది.