యూఏఈ: యూఏఈలో రహదారి భద్రతను మెరుగుపరచడం, ప్రజా రహదారులపై నిర్లక్ష్యపు ప్రవర్తనను తగ్గించడం లక్ష్యంగా ప్రతిపాదించిన ఒక చట్టం ప్రకారం.. దుబాయ్‌లో పిల్లలు ఎలక్ట్రిక్ స్కూటర్లను దుర్వినియోగం చేస్తే, తల్లిదండ్రులు త్వరలో చట్టపరంగా బాధ్యత వహించాల్సి రావచ్చు.

దుబాయ్ పోలీసు ఆపరేషన్స్ అసిస్టెంట్ కమాండర్-ఇన్-చీఫ్ లెఫ్టినెంట్ జనరల్ సైఫ్ ముహైర్ అల్ మజ్రూయీ మాట్లాడుతూ.. పిల్లలు ఎలక్ట్రిక్ స్కూటర్లను ఉపయోగిస్తున్నప్పుడు వారికి హాని జరిగినా లేదా ఇతరుల ప్రాణాలకు ప్రమాదం కలిగించినా, తల్లిదండ్రులను బాధ్యులను చేసే చట్టాన్ని అధికారులు రూపొందిస్తున్నారని తెలిపారు. 

ఎలక్ట్రిక్ స్కూటర్లు ఇకపై కేవలం వినోద సాధనాలుగా మాత్రమే మిగిలిపోలేదని, కొన్ని సందర్భాల్లో అవి రహదారి వినియోగదారులకు నిజమైన ప్రమాదంగా మారాయని అల్ మజ్రూయీ పేర్కొన్నారు. నిషేధిత ప్రాంతాల్లో మైనర్లు స్కూటర్ నడిపినప్పుడు లేదా చట్టబద్ధమైన వేగ పరిమితులను మించి ప్రయాణించేలా స్కూటర్లను మార్పులు చేసినప్పుడు, తల్లిదండ్రులను బాధ్యులను చేయడం ద్వారా అసురక్షిత పద్ధతులను నిరోధించడమే ఈ ప్రతిపాదిత చట్టం లక్ష్యమని ఆయన వివరించారు.

కొన్ని స్కూటర్లను పరిమితులకు మించి గంటకు 120 కిలోమీటర్ల వేగాన్ని అందుకునేలా మార్పులు చేశారు. చట్టవిరుద్ధ కార్యకలాపాలతో సహా దుర్వినియోగాన్ని నిరోధించడానికి, అన్ని స్కూటర్లను రిజిస్టర్ చేసి నంబర్ ప్లేట్లను జారీ చేయాలని కూడా ఈ ముసాయిదా చట్టం సూచిస్తుందని తెలిపారు.

యూఏఈ వ్యాప్తంగా ఇ-స్కూటర్ సంబంధిత ప్రమాదాల సంఖ్య పెరుగుతుండటంపై ఆందోళనల నేపథ్యంలో ఈ ప్రతిపాదన వచ్చిందన్నారు. ఎలక్ట్రిక్ స్కూటర్ల దుర్వినియోగాన్ని నివారించడంలో తల్లిదండ్రుల బాధ్యత కీలక పాత్ర పోషిస్తుందని అధికారులు పదేపదే హెచ్చరిస్తున్నారని గుర్తుచేశారు.

2024లో దుబాయ్‌లో 254 ఇ-స్కూటర్ మరియు సైకిల్ సంబంధిత ప్రమాదాలు నమోదయ్యాయి. వీటిలో 10 మంది మరణించగా, 17 తీవ్రమైన కేసులతో సహా 259 మంది గాయపడ్డారు.

2025లో పరిస్థితి మరింత తీవ్రమైంది. ఫిబ్రవరిలో కేవలం మూడు రోజుల్లోనే 15, 9 ఏళ్ల వయసున్న మైనర్లు ఇ-స్కూటర్ల కారణంగా చనిపోయారు. 2025 మొదటి ఐదు నెలల్లోనే, ఇ-స్కూటర్ల దుర్వినియోగం మరియు రోడ్డు నిబంధనలు ఉల్లంఘించడం వల్ల 13 మరణాలు చోటుచేసుకున్నాయి.  

ఈ క్రమంలో అధికారులు తనిఖీలను ముమ్మరం చేశారు. కైట్ బీచ్ వద్ద ప్రమాదకరమైన విన్యాసాలు చేస్తూ పట్టుబడిన 90 మంది వ్యక్తులపై దుబాయ్ పోలీసులు గతంలో చర్యలు తీసుకున్నారు. వారి ఈ- స్కూటర్లను స్వాధీనం చేసుకున్నారు.  మొత్తంగా యూఏఈలో మైక్రోమొబిలిటీతో ముడిపడి ఉన్న పెరుగుతున్న ప్రమాదాలను పరిష్కరించడానికి ఇలాంటి చర్యలు అవసరమని అధికారులు అంటున్నారు.