రియాద్ః సౌదీ భద్రతా అధికారులు గత వారంలో మొత్తం 12,192 మంది అక్రమ నివాసితులను అరెస్టు చేశారు. ఏప్రిల్ 16 నుండి ఏప్రిల్ 22 మధ్య కాలంలో వివిధ శాఖల సమన్వయంతో భద్రతా దళాలు నిర్వహించిన సంయుక్త తనిఖీల సందర్భంగా ఈ అరెస్టులు జరిగినట్లు అంతర్గత వ్యవహారాల మంత్రిత్వ శాఖ వెల్లడించింది. అరెస్టు అయిన వారిలో నివాస చట్టాన్ని ఉల్లంఘించిన వారు 6,606 మంది, సరిహద్దు భద్రతా చట్టాన్ని ఉల్లంఘించిన వారు 3,510 మంది మరియు కార్మిక చట్టాన్ని ఉల్లంఘించిన వారు 2,076 మంది ఉన్నారు.
ఇక అనుమతి లేకుండా సౌదీలోకి ప్రవేశించడానికి ప్రయత్నిస్తూ అరెస్టు అయిన వారి సంఖ్య మొత్తం 1,454గా ఉంది. వీరిలో 32 శాతం మంది యెమెన్ జాతీయులు, 67 శాతం మంది ఇథియోపియా జాతీయులు మరియు ఒక శాతం మంది ఇతర దేశాలకు చెందినవారు ఉన్నారు.  మొత్తం 17,368 మంది అక్రమ నివాసితులను దేశం నుండి బహిష్కరించారు (deport చేశారు). అదేవిధంగా, సౌదీ చట్టాలను ఉల్లంఘించిన వారికి ఆశ్రయం, రవాణా మరియు ఉపాధి కల్పించడంలో సహకరించిన సుమారు 22 మందిని అధికారులు అరెస్టు చేశారు.

అక్రమ నివాసితులకు ఆశ్రయం లేదా మరే ఇతర సహాయం గానీ, సేవ గానీ అందించినా... అటువంటి వారికి గరిష్టంగా 15 సంవత్సరాల జైలు శిక్ష మరియు గరిష్టంగా 1 మిలియన్ సౌదీ రియాల్స్ (SR) జరిమానా విధిస్తామని అంతర్గత వ్యవహారాల మంత్రిత్వ శాఖ హెచ్చరించింది. మక్కా, రియాద్ మరియు తూర్పు ప్రావిన్స్ ప్రాంతాలలో 911 నంబరుకు, అలాగే మిగిలిన ప్రాంతాలలో 999 మరియు 996 నంబర్లకు కాల్ చేయడం ద్వారా ఉల్లంఘనల కేసులను నివేదించాలని మంత్రిత్వ శాఖ ప్రజలను కోరింది.