న్యూ ఢిల్లీ: ఢిల్లీలోని వివేక్ విహార్ ప్రాంతంలో శనివారం అర్ధరాత్రి ఘోర ప్రమాదం సంభవించింది. ఒక నాలుగు అంతస్తుల భవనంలో ఒక్కసారిగా ఏసీ కంప్రెసర్ పేలడంతో భారీ ఎత్తున మంటలు చెలరేగాయి. నిద్రలో ఉన్న వారంతా పొగ, మంటల ధాటికి ఉక్కిరిబిక్కిరి అయ్యారు. ఈ ప్రమాదంలో ఇప్పటివరకు ఎనిమిది మంది ప్రాణాలు కోల్పోయినట్లు అధికారిక వర్గాలు ధ్రువీకరించాయి. మంటలు క్షణాల్లో భవనం అంతటా వ్యాపించడంతో లోపల ఉన్న వారు బయటకు రావడానికి మార్గం లేక సజీవ దహనమయ్యారు.

ప్రమాదం గురించి సమాచారం అందుకున్న వెంటనే అగ్నిమాపక సిబ్బంది ఘటనా స్థలానికి చేరుకున్నారు.దాదాపు పదికి పైగా ఫైర్ ఇంజిన్లతో మంటలను అదుపు చేసేందుకు తీవ్రంగా ప్రయత్నించారు. భవనంలో చిక్కుకున్న మరో పది మందిని సిబ్బంది సాహసోపేతంగా కాపాడారు. తీవ్రంగా గాయపడిన మరో నలుగురిని చికిత్స నిమిత్తం సమీపంలోని ఆసుపత్రికి తరలించారు. గాయపడిన వారిలో కొందరి పరిస్థితి విషమంగా ఉండటంతో మృతుల సంఖ్య ఇంకా పెరిగే అవకాశం ఉందని వైద్యులు ఆందోళన వ్యక్తం చేస్తున్నారు. సహాయక చర్యలు కొనసాగుతుండటంతో ఆ ప్రాంతంలో విషాద ఛాయలు అలముకున్నాయి.

ఈ ప్రమాదం నేపథ్యంలో వేసవి కాలంలో ఎయిర్ కండిషనర్లు (AC) వాడేవారు అప్రమత్తంగా ఉండాలని నిపుణులు హెచ్చరిస్తున్నారు.ఎండలు తీవ్రంగా ఉన్న సమయంలో ఏసీలను నిరంతరాయంగా వాడటం వల్ల కంప్రెసర్ల పై ఒత్తిడి పెరిగి పేలుళ్లకు దారితీసే ప్రమాదం ఉంది. ఏసీలకు క్రమం తప్పకుండా సర్వీసింగ్ చేయించడం, నాణ్యమైన వైరింగ్ వాడటం మరియు పాత మెషీన్ల విషయంలో జాగ్రత్తగా ఉండటం చాలా ముఖ్యం. ముఖ్యంగా షార్ట్ సర్క్యూట్ జరగకుండా చూసుకోవాలని, ఏదైనా తేడా గమనిస్తే వెంటనే స్విచ్ ఆఫ్ చేయాలని సూచిస్తున్నారు. వివేక్ విహార్ ఘటన విలాసవంతమైన వస్తువుల నిర్వహణలో నిర్లక్ష్యం ఎంతటి ప్రాణనష్టానికి దారితీస్తుందో గుర్తు చేస్తోంది.