త్వరలో ప్రారంభం కానున్న షేరింగ్ పర్మిట్ దరఖాస్తులు

దుబాయ్: దుబాయ్‌లో షేర్డ్ హౌసింగ్ వ్యవస్థను నియంత్రించేందుకు తీసుకొచ్చిన కొత్త చట్టం అమలులో భాగంగా షేరింగ్ పర్మిట్‌ల కోసం దరఖాస్తుల ప్రక్రియ త్వరలో ప్రారంభం కానుంది. సంబంధిత విధానాలు, నిబంధనలు ప్రకటించిన తర్వాత అర్హత కలిగిన ఆస్తులు దరఖాస్తు చేసుకునే అవకాశం ఉంటుందని దుబాయ్ మునిసిపాలిటీ (DM) వెల్లడించింది.

దుబాయ్ మునిసిపాలిటీ డిజిటల్ ప్లాట్‌ఫారమ్‌ల ద్వారా దరఖాస్తులు స్వీకరించనున్నట్లు అధికారులు తెలిపారు. ఆస్తి యజమానులు, నిర్వహణ సంస్థలకు స్పష్టత కల్పించేందుకు సమగ్ర మార్గదర్శకాలు సిద్ధం చేస్తున్నట్లు పేర్కొన్నారు.

కొత్త చట్టానికి నేపథ్యం

ఈ ఏడాది మార్చిలో యూఏఈ ఉపాధ్యక్షుడు, ప్రధానమంత్రి మరియు దుబాయ్ పాలకుడు షేక్ మహ్మద్ బిన్ రషీద్ అల్ మక్తూమ్ షేర్డ్ హౌసింగ్ నిర్వహణ మరియు నివాస నియంత్రణకు సంబంధించిన కొత్త చట్టాన్ని జారీ చేశారు.

అనధికారికంగా విభజించిన గదులు, అధిక జనసాంద్రత ఉన్న అపార్ట్‌మెంట్‌లపై అల్ రిగ్గా, అల్ మురక్కబాత్, అల్ బర్షా, అల్ సత్వా, అల్ రఫ్ఫా వంటి ప్రాంతాల్లో జరిగిన తనిఖీలు, చర్యల తర్వాత ఈ చట్టం తీసుకువచ్చారు.

పర్మిట్‌లో ఏముంటుంది?

ప్రతి షేర్డ్ హౌసింగ్ పర్మిట్‌లో ఆస్తి సాంకేతిక ప్రమాణాలు, భద్రతా నిబంధనలు పాటిస్తున్నదీ లేదో పరిశీలించబడుతుంది. ఇందులో ముఖ్యంగా:

• గరిష్టంగా ఎంతమంది నివసించవచ్చు
• ఒక్కో వ్యక్తికి ఉండాల్సిన కనీస విస్తీర్ణం
• అవసరమైన సాధారణ సౌకర్యాలు

వంటి అంశాలు పరిగణనలోకి తీసుకోబడతాయి.

పర్మిట్ ఫీజులు, అనుమతి ప్రక్రియకు పట్టే సమయం వంటి వివరాలు ఇంకా ఖరారు కాలేదని, త్వరలో ప్రకటిస్తామని మునిసిపాలిటీ తెలిపింది.

ఇక పై టెనెంట్లకు సబ్‌లీజ్ అవకాశం లేదు

కొత్త చట్టంలో అత్యంత కీలకమైన మార్పు ఏమిటంటే — ఇకపై అద్దెకు తీసుకున్న వ్యక్తి ఆ ఇంటిని విభజించి ఇతరులకు సబ్‌లీజ్ ఇవ్వడం నిషేధం.

కేవలం ఆస్తి యజమాని లేదా లైసెన్స్ పొందిన సంస్థ మాత్రమే యూనిట్‌ను అద్దెకు ఇవ్వగలదు. యజమాని తరఫున నిర్వహణ సంస్థలు కూడా లీజింగ్ నిర్వహించవచ్చు.

పర్మిట్ గడువు, నిబంధనలు

షేర్డ్ హౌసింగ్ పర్మిట్ ఒక సంవత్సరానికి చెల్లుబాటు అవుతుంది. అదే గడువుకు పునరుద్ధరించుకునే అవకాశం ఉంటుంది. యజమానులు కోరితే రెండు సంవత్సరాల పర్మిట్ కూడా పొందవచ్చు.

పునరుద్ధరణ కోసం ప్రస్తుత పర్మిట్ గడువు ముగియడానికి కనీసం 30 రోజుల ముందే దరఖాస్తు చేయాలి.

ఉల్లంఘనలకు భారీ జరిమానాలు

నిబంధనలు ఉల్లంఘించిన వారికి Dh500 నుంచి Dh500,000 వరకు జరిమానాలు విధించే అవకాశం ఉంది. ఒకే ఏడాదిలో మళ్లీ నిబంధనలు ఉల్లంఘిస్తే జరిమానా రెట్టింపు అవుతూ గరిష్టంగా Dh1 మిలియన్ వరకు చేరవచ్చు.

కొత్త చట్టంతో దుబాయ్‌లో షేర్డ్ హౌసింగ్ వ్యవస్థ మరింత క్రమబద్ధీకరణ దిశగా వెళ్లనుందని అధికారులు భావిస్తున్నారు.