యూఏఈ: ఈద్ అల్ అదా పండుగకు ముందు యూఏఈ నుండి ప్రధాన అరబ్ గమ్యస్థానాలకు విమాన ఛార్జీలు 45 శాతం వరకు పెరిగాయి. బలమైన సీజనల్ డిమాండ్, పరిమిత సీట్ల లభ్యత మరియు చివరి నిమిషంలో బుకింగ్‌లు పెరగడం వంటివి ప్రాంతీయ మార్గాలపై ఒత్తిడిని పెంచాయని ట్రావెల్ ఏజెన్సీలు తెలిపాయి.

ట్రావెల్ ఏజెన్సీలు తెలిపిన ప్రకారం, ఇటీవలి వారాల్లో కీలకమైన అరబ్ నగరాలకు విమానాల డిమాండ్ గణనీయంగా పెరిగింది. ఈద్ మరియు హజ్ యాత్రల డిమాండ్ ఒకేసారి రావడంతో సౌదీ అరేబియా బలమైన మార్కెట్‌గా అవతరించింది.

అల్ సాఫ్రాన్ ట్రావెల్ & టూరిజం LLC మేనేజింగ్ డైరెక్టర్ ప్రవీణ్ చౌదరి మాట్లాడుతూ.. గత వారాలతో పోలిస్తే అనేక మార్గాల్లో విమాన సీట్ల ఆక్యుపెన్సీ సుమారు 70 శాతం నుండి 75 శాతం వరకు పెరిగిందని చెప్పారు.  ఈద్ సెలవుల కారణంగా, ప్రజలు ఎప్పుడూ తమ స్వదేశాలకు వెళ్లడానికి ఆసక్తి చూపుతారని, కాబట్టి ఈ కాలంలో డిమాండ్ అకస్మాత్తుగా పెరుగుతుందన్నారు. అలాగే, అధిక ఇంధన ఛార్జీలు మరియు చివరి నిమిషంలో పెద్ద సంఖ్యలో బుకింగ్‌లు చేసుకోవడం వల్ల కూడా విమాన ఛార్జీలు పెరిగాయని పేర్కొన్నారు.

అరబ్ గమ్యస్థానాలలో ప్రస్తుతం సౌదీ అరేబియాలోని రియాద్, జెడ్డా మరియు మదీనాలకు అత్యధిక డిమాండ్ ఉందని తెలిపారు. ఆ తర్వాత కైరో మరియు అమ్మాన్‌లకు అత్యధిక డిమాండ్ ఉందని చౌదరి తెలిపారు. గత రెండు నెలలతో పోలిస్తే ఈ మార్గాల్లో టిక్కెట్ల ధరలు సుమారు 25 శాతం నుండి 45 శాతం వరకు పెరిగాయని, కొన్ని మార్గాల్లో సగటు ఛార్జీలు దాదాపు 3,500 దిర్హమ్‌లకు చేరుకున్నాయని ఆయన పేర్కొన్నారు.

ముసాఫిర్.కామ్ కార్యకలాపాల ఉపాధ్యక్షురాలు రషీదా జాహిద్ మాట్లాడుతూ.. పెరుగుతున్న ప్రయాణ డిమాండ్‌కు ఇప్పటికీ పరిమితంగా ఉన్న విమానయాన సంస్థల సామర్థ్యానికి మధ్య ఉన్న అసమతుల్యతే ఛార్జీల పెంపునకు కారణమని అన్నారు.   అనేక ప్రముఖ మార్గాల్లో సీట్ల లభ్యత తక్కువగానే ఉందని వివరించారు.  

ఈ సంవత్సరం ఈద్ సెలవులు ఎక్కువ కాలం ఉండటం వల్ల యూఏఈ నివాసితుల విదేశీ ప్రయాణాలకు ఆసక్తి చూపడంతో డిమాండ్ మరింత పెరిగిందని, దీనివల్ల విమానాలలో సీట్లు మామూలు కన్నా చాలా వేగంగా బుకింగ్ అయిపోతున్నట్లు తెలిపారు.ముఖ్యంగా ప్రముఖ అరబ్ గమ్యస్థానాలతో పాటు సీఐఎస్ మరియు బాల్కన్ మార్కెట్లకు వెళ్లే మార్గాల్లో డిమాండ్ స్పష్టంగా కనిపిస్తోందన్నారు. ఇక్కడ పరిమిత సీట్ల లభ్యత మరియు పండుగల సమయంలో అధిక డిమాండ్ కారణంగా అన్నిచోట్లా ఛార్జీలు పెరుగుతున్నాయని వివరించారు.  

ప్రయాణికులు సెర్బియా, బోస్నియా మరియు అల్బేనియా వంటి బాల్కన్ గమ్యస్థానాలపై కూడా ఎక్కువగా ఆసక్తి చూపుతున్నారని జాహిద్ అన్నారు. అందుబాటులో ధరలు, సహజసిద్ధమైన దృశ్యాలు మరియు పెరుగుతున్న హలాల్-స్నేహపూర్వక పర్యాటక అవకాశాలు వారిని ఆకర్షిస్తున్నాయని తెలిపారు.

ఈద్ ప్రయాణం రద్దీ విమానయాన సంస్థల ధరలపై గణనీయమైన ఒత్తిడిని కొనసాగిస్తోందని ప్లూటో మేనేజింగ్ పార్టనర్ భరత్ ఐదాసాని  పేర్కొన్నారు. ఈద్ అల్ అదాకు ముందు విమాన ఛార్జీల పెరుగుదలకు ప్రధానంగా డిమాండ్ మరియు సామర్థ్య పరిస్థితులే కారణమని పేర్కొన్నారు.  జిసిసిలో ఈద్ అత్యంత రద్దీగా ఉండే ప్రయాణ కాలాల్లో ఒకటని, ఈ సమయంలో ప్రవాసులు తమ స్వదేశాలకు వెళ్తుండగా, స్థానికులు చిన్న విహార యాత్రలు, సెలవుల కోసం ప్రణాళికలు వేసుకుంటారని వివరించారు.

ఈ సీజన్‌లో ఈజిప్ట్, జోర్డాన్, ఒమన్ వంటి గమ్యస్థానాలకు బలమైన డిమాండ్ ఉందని, విమానాల లభ్యత పరిమితంగా ఉండటం టిక్కెట్ల ధరలు పెరగడానికి దోహదపడుతోందని ఐదాసాని తెలిపారు. డిమాండ్ మరియు విమానాల పరిమిత లభ్యత కారణంగా ధరలు పెరిగాయని అన్నారు.

ప్రధాన ప్రాంతీయ మార్గాల్లో అందుబాటులో ఉన్న సీట్ల కంటే డిమాండ్ ఎక్కువగా ఉండటంతో ఈద్ సెలవులు ముగిసే వరకు విమాన ఛార్జీలు అధికంగానే ఉంటాయని ట్రావెల్ ఏజెన్సీలు అంచనా వేస్తున్నాయి.