యూఏఈః యూఏఈ పర్యటన భాగంగా నేడు భారత ప్రధాని నరేంద్ర మోదీ అబుదాబికి రానున్నారు. ఈ నేపథ్యంలో యూఏఈ అధ్యక్షుడు మహమ్మద్ బిన్ జాయెద్ అల్ నహ్యాన్, భారత ప్రధాని మోదీల మధ్య ఉన్న సన్నిహిత వ్యక్తిగత సంబంధం మరోసారి ప్రధాన చర్చనీయాంశం కానుందని యూఏఈలోని భారత రాయబారి దీపక్ మిట్టల్ తెలిపారు. 
మోదీ తన ఐదు దేశాల పర్యటనలో భాగంగా యూఏఈలో కేవలం కొన్ని గంటల పాటు మాత్రమే పర్యటించనున్నారు. ఇంత స్వల్ప పర్యటన కూడా వారి సమావేశం ప్రాముఖ్యతను తెలియజేస్తుందని మిట్టల్ చెప్పారు.
ఈ సందర్భంగా జనవరిలో షేక్ మహమ్మద్ భారతదేశ పర్యటనను కూడా మిట్టల్ గుర్తుచేసారు. "షేక్ మహమ్మద్ జనవరిలో భారతదేశానికి వెళ్లారు. ఆయన మళ్లీ అక్కడ కొన్ని గంటల పాటు ఉన్నారు. తక్కువ సమయంలో కీలకమైన పనులను పూర్తి చేశారు ." అని వివరించారు. ముఖ్యంగా మౌలిక సదుపాయాలు, లాజిస్టిక్స్, స్వచ్ఛ ఇంధనం, రక్షణ వంటి రంగాలతోపాటు ద్వైపాక్షిక వాణిజ్యాన్ని పెంచిన భారత్-యూఏఈ సమగ్ర ఆర్థిక భాగస్వామ్య ఒప్పందం (CEPA) కింద సాధించిన పురోగతిని సమీక్షించే అవకాశం ఉందన్నారు.
అధికారిక గణాంకాల ప్రకారం, 2023-24లో ఇరు దేశాల మధ్య ద్వైపాక్షిక వాణిజ్యం సుమారు 84 బిలియన్ డాలర్లకు చేరుకుంది. దీంతో చైనా, అమెరికా తర్వాత యూఏఈ భారతదేశానికి మూడవ అతిపెద్ద వాణిజ్య భాగస్వామిగా నిలిచింది. 2000 సంవత్సరం నుండి భారతదేశంలో యూఏఈ పెట్టుబడులు 22 బిలియన్ డాలర్లను దాటాయి.  
ప్రాంతీయ భద్రతకు అధిక ప్రాధాన్యత
ప్రస్తుతం కొనసాగుతున్న అమెరికా-ఇజ్రాయెల్-ఇరాన్ సంఘర్షణకు సంబంధించిన ప్రాంతీయ ఉద్రిక్తతలు, ఇంధన మార్కెట్లు మరియు నౌకా మార్గాలపై దాని ప్రభావం గురించి కూడా ఈ సమావేశంలో చర్చించే అవకాశం ఉంది. గల్ఫ్ నుండి  చమురు మరియు గ్యాస్‌  దిగుమతి చేసుకునే భారత్, సరుకు రవాణాకు అంతరాయాలు మరియు పెరుగుతున్న ఇంధన ధరలతో ఇబ్బందులు ఎదుర్కొంటుంది. ప్రపంచంలోని అత్యంత ముఖ్యమైన చమురు రవాణా మార్గాలలో ఒకటైన హోర్ముజ్ జలసంధి వంటి కీలకమైన కారిడార్ల ద్వారా సముద్ర భద్రత మరియు వాణిజ్యం నిరంతరాయంగా సాగడం వంటి అంశాలపై చర్చించే అవకాశం ఉంది.
బలమైన ప్రజల మధ్య సంబంధాలు
యూఏఈలో సుమారు 47 లక్షల మంది భారతీయులు నివసిస్తున్నారు. ఆరోగ్య సంరక్షణ, టెక్నాలజీ, ఫైనాన్స్, హాస్పిటాలిటీ, రిటైల్, మరియు నిర్మాణం వంటి పలు రంగాలలో భారతీయులు తమ వంతు సహకారాన్ని అందిస్తున్నారు. అదే సమయంలో యూఏఈ నుండి భారతదేశానికి వచ్చే రెమిటెన్సులు ప్రపంచవ్యాప్తంగా అత్యధికంగా ఉన్నాయి.  
యూఏఈ పర్యటన అనంతరం, కీలకమైన ఐరోపా ఆర్థిక వ్యవస్థలతో వాణిజ్య, పెట్టుబడి భాగస్వామ్యాలను బలోపేతం చేసుకునేందుకు భారత్ ప్రయత్నిస్తున్న నేపథ్యంలో భారత ప్రధాని మోదీ.. నెదర్లాండ్స్, స్వీడన్, నార్వే, ఇటలీ దేశాలలో పర్యటించనున్నారు.