మెక్సికో దేశంలో పెను గాలులతో కూడిన భారీ వర్షాల కారణంగా కొండచరియలు విరిగిపడటంతో 38మంది మృత్యువాత పడ్డారు. అధికారుల వివరణ ప్రకారం.. గత 24 గంటలుగా కుండపోతగాకురుస్తున్న వర్షాల కారణంగా పుయెబ్లా రాష్ట్రంలో కొండచరియలు విరిగిపడడంతో పలుచోట్ల ఇళ్లు ధ్వంసమయ్యాయి. శిథిలాల కింద 28 మంది మృతిచెందగా వారిలో 15మంది పిల్లలు వున్నట్లు సమాచారం. వెరాక్రూజ్‌లోనూ ఇలాంటి పరిస్థితుల్లోనే మరో పది మంది ప్రాణాలను కోల్పోయినట్లు అధికారులు తెలిపారు.
హాచినాంగో పట్టణంలో సాధారణంగా నెల వ్యవధిలో కురిసే వర్షం ఒక్క రోజులో కురవడంతో ఏకంగా ఒక కొండే కుప్ప కూలింది. కరిగి నీరయ్యింది. కొండను ఆనుకుని ఉన్న గ్రామాన్ని ఆ బురదనీరు ముంచెత్తడంతో 11 మంది మృతిచెందారు. వెరాక్రూజ్‌లో నదులు పొంగిపొరలుతుండగా పుయెబ్లాలో వందలాది మంది ఇళ్లు కోల్పోయి నిరాశ్రయులయ్యారు.