2026-27 విద్యా సంవత్సరానికి KHDA కీలక ప్రకటన

దుబాయ్: దుబాయ్‌లోని ప్రైవేట్ పాఠశాలల ఫీజులను 2026-27 విద్యా సంవత్సరానికి పెంచబోమని నాలెడ్జ్ అండ్ హ్యూమన్ డెవలప్‌మెంట్ అథారిటీ (KHDA) ప్రకటించింది. ఈ నిర్ణయం తల్లిదండ్రులకు ఊరటనిచ్చే అంశంగా మారింది.

దుబాయ్ క్రౌన్ ప్రిన్స్, యూఏఈ ఉప ప్రధానమంత్రి మరియు రక్షణ మంత్రి షేక్ హమ్దాన్ బిన్ మొహమ్మద్ బిన్ రషీద్ అల్ మక్తూమ్ ఆమోదించిన రెండో ఆర్థిక ప్రోత్సాహక ప్యాకేజీ నేపథ్యంలో ఈ నిర్ణయం తీసుకున్నారు.

Dh1.5 బిలియన్ ఆర్థిక ప్రోత్సాహక ప్యాకేజీ

షేక్ హమ్దాన్ ప్రకటించిన రెండో ఆర్థిక ప్యాకేజీ విలువ Dh1.5 బిలియన్‌గా ఉంది. ఇటీవల ప్రకటించిన ఇతర ప్రోత్సాహకాలతో కలిపి మొత్తం విలువ Dh2.5 బిలియన్‌కు చేరింది.

ఈ ప్యాకేజీలో 33 కీలక కార్యక్రమాలు ఉండగా, వాటిని మూడు నుంచి 12 నెలల వ్యవధిలో అమలు చేయనున్నారు. పర్యాటకం, వాణిజ్యం, విద్య, కస్టమ్స్ సేవలు వంటి ప్రధాన రంగాలకు ఈ పథకాలు ప్రయోజనం చేకూర్చనున్నాయి.

విద్యా రంగానికి ప్రత్యేక ఊరట

KHDA అనుమతి పొందిన ప్రైవేట్ విద్యాసంస్థలకు లైసెన్స్ రీన్యువల్ ఫీజుల చెల్లింపులో వాయిదాలు లేదా విడతల సౌకర్యం కల్పించనున్నారు. అలాగే జరిమానాల చెల్లింపును కూడా వాయిదా వేయనున్నారు.

ప్రైవేట్ నర్సరీలు, ఎర్లీ చైల్డ్‌హుడ్ సెంటర్లకు లైసెన్స్ రీన్యువల్ ఫీజులు, జరిమానాలు, దుబాయ్ మున్సిపాలిటీ మార్కెట్ ఫీజుల నుంచి మినహాయింపు ఇవ్వనున్నారు.

ఇక నిర్మాణ దశలో ఉన్న ఎర్లీ చైల్డ్‌హుడ్ సెంటర్లకు అద్దె రాయితీలు, అదనపు అద్దె రహిత కాలాన్ని కూడా ప్రభుత్వం కల్పించనుంది.

అద్దె పెంపులపై తాత్కాలిక నిలుపుదల

విద్యాసంస్థలకు సంబంధించిన ఒప్పందాల రద్దుపై గ్యారంటీ ఇన్సూరెన్స్ నిబంధనల నుంచి పూర్తి లేదా పాక్షిక మినహాయింపులు ఇవ్వనున్నారు. అలాగే ఒప్పంద ఉల్లంఘనలకు సంబంధించిన జరిమానాలను తాత్కాలికంగా నిలిపివేయడం, అద్దె పునరుద్ధరణ సమయంలో పెంపులను ఫ్రీజ్ చేయడం, అద్దె చెల్లింపులకు గడువు పొడిగించడం వంటి చర్యలు అమలు కానున్నాయి.

ఉపాధి, ఆర్థిక వ్యవస్థకు బలం

యూఏఈ ఆర్థిక నిపుణుల అభిప్రాయం ప్రకారం, ఈ ప్రోత్సాహక ప్యాకేజీలు దుబాయ్ ఆర్థిక వ్యవస్థకు మద్దతు ఇవ్వడంతో పాటు వివిధ రంగాల్లో ఉద్యోగాలను కాపాడటానికి దోహదపడతాయి.