న్యూ ఢిల్లీ: భారత పర్యటనలో ఉన్న అమెరికా విదేశాంగ మంత్రి మార్కో రూబియో, ఈ రోజు (మే 23) న్యూఢిల్లీలోని ‘సేవా తీర్థ్’లో ప్రధానమంత్రి నరేంద్ర మోదీతో అధికారికంగా భేటీ అయ్యారు. దాదాపు గంటకు పైగా సాగిన ఈ ఉన్నత స్థాయి సమావేశంలో ఇరు దేశాల మధ్య వ్యూహాత్మక, దౌత్యపరమైన బంధాన్ని మరింత బలోపేతం చేయడంపై సుదీర్ఘ చర్చలు జరిగాయి. ఈ సందర్భంగా అమెరికా అధ్యక్షుడు డొనాల్డ్ ట్రంప్ తరఫున ప్రధాని మోదీని వైట్‌హౌస్‌కు రావాల్సిందిగా మార్కో రూబియో అధికారికంగా ఆహ్వానించారు.

ఈ ద్వైపాక్షిక భేటీలో ముఖ్యంగా ఇండో-పసిఫిక్ ప్రాంతంలో భద్రత, స్వేచ్ఛా వాణిజ్యం, మరియు రక్షణ రంగంలో పరస్పర సహకారాన్ని పెంపొందించుకోవడంపై ఇరువురు నేతలు కీలక చర్చలు జరిపారు. పశ్చిమాసియాలో నెలకొన్న తాజా పరిస్థితులు, ఇంధన భద్రత (Energy Security) వంటి అంశాలు కూడా ఈ సమావేశంలో ప్రముఖంగా చర్చకు వచ్చాయి. అమెరికా నుంచి భారత్‌కు ఇంధన సరఫరాను పెంచడం, అలాగే గ్లోబల్ సప్లై చైన్ వ్యవస్థలో చైనాపై ఆధారపడటాన్ని తగ్గించేందుకు వీలుగా వ్యూహాత్మక ఖనిజాల సరఫరాను విస్తరించడంపై ఇరు దేశాలు సానుకూలత వ్యక్తం చేశాయి.

నాలుగు రోజుల భారత పర్యటన కోసం దేశంలోకి అడుగుపెట్టిన మార్కో రూబియో, మొదటగా కోల్‌కతాలోని మదర్ థెరిస్సా ‘మదర్ హౌస్’ను సందర్శించిన అనంతరం ఢిల్లీ చేరుకుని ప్రధాని మోదీని కలిశారు. ఈ పర్యటనలో భాగంగా ఆయన రేపు (మే 24) భారత విదేశాంగ మంత్రి డాక్టర్ ఎస్. జైశంకర్‌తో ప్రత్యేకంగా సమావేశం కానున్నారు. అలాగే మే 26న న్యూఢిల్లీలో జరగబోయే ప్రతిష్టాత్మక ‘క్వాడ్’ (Quad) కూటమి విదేశాంగ మంత్రుల సదస్సులో కూడా అమెరికా ప్రతినిధిగా మార్కో రూబియో పాల్గొనబోతున్నారు.