దోహా: ఇరాన్‌ ఖతార్‌తో పాటు జోర్డాన్, బహ్రెయిన్, కువైట్ భూభాగాలపై జరిపిన తాజా దాడులను ఖతార్ తీవ్రంగా ఖండించింది. ఈ దాడులు ఆయా దేశాల సార్వభౌమాధికారం, ప్రాదేశిక సమగ్రతపై జరిగిన బహిరంగ ఉల్లంఘన అని ఖతార్ విదేశాంగ మంత్రిత్వ శాఖ పేర్కొంది. ఈ దాడులు అంతర్జాతీయ చట్టాలు, ఐక్యరాజ్యసమితి చార్టర్, పొరుగు దేశాలతో సత్సంబంధాల సూత్రాలను ఉల్లంఘిస్తున్నాయని ఖతార్ ఆరోపించింది. ఇలాంటి చర్యలు మధ్యప్రాచ్యంలో ఉద్రిక్తతలను మరింత పెంచడంతో పాటు, శాంతి భద్రత కోసం జరుగుతున్న దౌత్య ప్రయత్నాలకు ఆటంకం కలిగిస్తాయని తెలిపింది.

ఈ దాడులకు, వాటి వల్ల కలిగే పరిణామాలకు అంతర్జాతీయ చట్టాల ప్రకారం ఇరానే పూర్తి బాధ్యత వహించాలని ఖతార్ స్పష్టం చేసింది. అలాగే, ఐక్యరాజ్యసమితి చార్టర్‌లోని ఆర్టికల్ 51 ప్రకారం తమ సార్వభౌమాధికారం, భద్రత, ప్రాదేశిక సమగ్రతను కాపాడుకునేందుకు అవసరమైన చర్యలు తీసుకునే హక్కు తమకు ఉందని వెల్లడించింది.
అంతేకాకుండా, జోర్డాన్, బహ్రెయిన్, కువైట్ దేశాలకు ఖతార్ తన సంఘీభావాన్ని ప్రకటిస్తూ ఆయా దేశాలు తమ భద్రత కోసం చేపట్టే చట్టబద్ధమైన చర్యలకు పూర్తి మద్దతు ఉంటుందని తెలిపింది. ప్రాంతీయ స్థిరత్వాన్ని దెబ్బతీసే అన్ని సైనిక చర్యలను వెంటనే నిలిపివేసి, అన్ని పక్షాలు సంయమనం పాటిస్తూ చర్చలు, దౌత్య మార్గానికే తిరిగి రావాలని ఖతార్ పిలుపునిచ్చింది.