దోహా: ఖతార్ లో ఆహార భద్రతా నిబంధనలను ఉల్లంఘించిన మూడు ప్రముఖ ఫుడ్ కోర్టులను ఖతార్ మున్సిపాలిటీ మంత్రిత్వ శాఖ సీజ్ చేసింది. మున్సిపల్ ఆరోగ్య నియంత్రణ బృందాలు నిర్వహించిన తనిఖీల అనంతరం ఈ మేరకు చర్యలు తీసుకున్నట్లు తెలిపారు.
అధికారులు సీజ్ చేసిన సంస్థలలో 'కెఫెటేరియా అల్ నైమి' (మూడు రోజుల పాటు మూసివేత), 'పారిస్ హైపర్‌మార్కెట్ బుచరీ' ( 45 రోజుల పాక్షిక మూసివేత),  'షై ఎక్స్‌ప్రెస్ రెస్టారెంట్' (15 రోజుల పాటు మూసివేత) ఉన్నాయి. ఈ సంస్థలు ప్రజా ఆరోగ్య ప్రమాణాలకు అనుగుణంగా లేని పరిస్థితుల్లో ఆహారాన్ని తయారు చేస్తున్నాయని, అలాగే ఖతార్ ఆహార నియంత్రణ చట్టాల కింద నిర్దేశించిన ఆహార భద్రతా నిబంధనలను పాటించడం లేదని మంత్రిత్వశాఖ తన ప్రకటనలో వెల్లడించింది.