కువైట్: దాదాపు 90 రోజుల పాటు మూసివేత తర్వాత, కువైట్ అంతర్జాతీయ విమానాశ్రయం టెర్మినల్ 1 (T1) తిరిగి కార్యకలాపాలను ప్రారంభించింది. రస్తుతం విమానాల రాకపోకలు ఉదయం 4:00 గంటల నుండి రాత్రి 10:00 గంటల మధ్య తాత్కాలిక షెడ్యూల్ ప్రకారం నడుస్తున్నాయని డైరెక్టరేట్ జనరల్ ఆఫ్ సివిల్ ఏవియేషన్ (DGCA) ఆపరేషన్స్ డైరెక్టర్ మన్సూర్ అల్-హషేమి తెలిపారు. రాబోయే కాలంలో క్రమంగా సాధారణ పనివేళలకు తిరిగి రావాలని యోచిస్తున్నట్లు తెలిపారు.

సోమావారం ఉదయం 9:55 గంటలకు ఎతిహాద్ ఎయిర్‌వేస్ విమానం మొదటిసారిగా విమానాశ్రయానికి చేరుకుందని చెప్పారు. అలాగే, ముంబై నుంచి వచ్చిన ఇండిగో ఎయిర్‌లైన్స్ విమానం కూడా చేరుకుందని, ఆ రోజు మొత్తం  18 విమానాలను  షెడ్యూల్ చేసినట్లు తెలిపారు. విమాన రద్దీ క్రమంగా పెరుగుతున్నందున, ప్రతి విమానయాన సంస్థ రోజుకు ఒక రౌండ్-ట్రిప్ సర్వీసును నడుపుతుందని ఆయన పేర్కొన్నారు.
ఇప్పటివరకు సుమారు 20 విమానయాన సంస్థలు కార్యకలాపాలను పునఃప్రారంభించడానికి దరఖాస్తు చేసుకుని, పౌర విమానయాన అథారిటీ నుండి అవసరమైన అనుమతులు పొందాయని అన్నారు. అధికారులు రద్దీగా ఉండే వేసవి ప్రయాణ కాలానికి సిద్ధమవుతున్నందున, రాబోయే రోజుల్లో విమాన కార్యకలాపాలు విస్తరిస్తాయని భావిస్తున్నట్లు అల్-హషేమి తెలిపారు.
ఇదిలా ఉండగా, జిసిసి మరియు అరబ్ గమ్యస్థానాలకు వెళ్లే విమానాల చెక్-ఇన్ కౌంటర్లు బయలుదేరడానికి ఒక గంట ముందు మూసివేయబడతాయని, ఇతర అంతర్జాతీయ గమ్యస్థానాల కౌంటర్లు బయలుదేరడానికి గంటన్నర ముందు మూసివేయబడతాయని ఆయన ప్రయాణికులకు గుర్తు చేశారు. ప్రయాణికులు తమ విమానానికి కనీసం నాలుగు గంటల ముందు విమానాశ్రయానికి చేరుకోవాలని సూచించారు. అంతర్జాతీయ భద్రతా ప్రమాణాలను పాటిస్తూనే, సేవలను సజావుగా మరియు క్రమంగా పునరుద్ధరించేందుకు సంబంధిత ఏజెన్సీలతో కలిసి పనిచేస్తున్నామని తెలిపారు.