కువైట్: కువైట్‌లో ఆదివారం తెల్లవారుజామున జరిగిన ఘోర ప్రమాదంలో, ఒక వాహనం అక్కడ నిలిపి ఉంచిన పలు బస్సులను ఢీకొట్టి బోల్తా పడటంతో పాటు అగ్నిప్రమాదానికి గురైంది. ఈ ఘటనలో ఇద్దరు వ్యక్తులు ప్రాణాలు కోల్పోయారని 'జనరల్ ఫైర్ ఫోర్స్' తెలిపింది. వాహనం బోల్తా పడి మంటలు అంటుకున్న సమాచారం అందగానే, సుభాన్ ఫైర్ సెంటర్‌కు చెందిన అగ్నిమాపక సిబ్బంది వెంటనే ఘటనా స్థలానికి చేరుకున్నారు. మంటలు పక్కనే నిలిపి ఉంచిన మరికొన్ని బస్సులకు కూడా వ్యాపించాయి. దాంతో అవి కూడా అగ్నికి ఆహుతయ్యాయి.
అగ్నిమాపక సిబ్బంది కష్టపడి మంటలను అదుపులోకి తెచ్చారు. ఈ ప్రమాదంలో ఇద్దరు వ్యక్తులు మరణించినట్లు జనరల్ ఫైర్ ఫోర్స్ ధృవీకరించింది. ఈ ఘటనకు దారితీసిన పరిస్థితులపై దర్యాప్తు ప్రారంభించినట్లు పేర్కొన్నారు. అయితే, బాధితుల వివరాలు లేదా ప్రమాదానికి గల కారణాలకు సంబంధించిన ఇతర వివరాలను అధికారులు ప్రకటించలేదు.