మనామా: మానవ అక్రమ రవాణా కేసులో ఒక ఆసియా మహిళను దోషిగా నిర్ధారించిన కోర్టు, ఆమెకు ఏడేళ్ల జైలు శిక్ష విధించింది. ఒక మహిళను చట్టవిరుద్ధ కార్యకలాపాలలో పాల్గొనేందుకు బలవంతం చేయడంతోపాటు లైంగిక వేధింపులకు పాల్పడినట్లు కోర్టు తెలిపింది.   హై క్రిమినల్ కోర్టు ఆమెకు 2,000 బహ్రెయిన్ దినార్ల జరిమానా కూడా విధించింది.  బాధితురాలిని స్వదేశానికి పంపించే ఖర్చులను కూడా చెల్లించాలని ఆదేశించింది. అలాగే, శిక్షాకాలం పూర్తయ్యాక శాశ్వతంగా దేశం నుండి బహిష్కరించాలని తన తీర్పులో కోర్టు పేర్కొంది.

జనరల్ డైరెక్టరేట్ ఆఫ్ క్రిమినల్ ఇన్వెస్టిగేషన్ అండ్ ఫోరెన్సిక్ సైన్స్‌లోని యాంటీ-హ్యూమన్ ట్రాఫికింగ్ డైరెక్టరేట్ నుండి ఒక నివేదిక అందిన తర్వాత ఈ కేసు ప్రారంభమైంది. బాధితురాలిని లైంగిక దోపిడీకి గురిచేసి, చట్టవిరుద్ధ కార్యకలాపాలలోకి బలవంతంగా లాగారని అధికారులు తెలిపారు. పబ్లిక్ ప్రాసిక్యూషన్ వెంటనే దర్యాప్తు ప్రారంభించింది.  బాధితురాలిని, మానవ అక్రమ రవాణా నిరోధక జాతీయ కమిటీ ఆధ్వర్యంలోని ఒక ఆశ్రయంలో పెట్టి సహాయ సహకారాలు అందజేశారు.