యూఏఈ: చాలా మంది యూఏఈ నివాసితులు సమ్మర్ లో తమ డైలీ ఫిట్ నెస్ కార్యక్రమాలను తరచూ వాయిదా వేస్తుంటారు.  అయితే,ఈ సమ్మర్ లో ఎలాంటి జిమ్ సభ్యత్వం కోసం డబ్బు చెల్లించకుండా యాక్టివ్ గా ఉండాలనుకునే నివాసితులకు ఒక కొత్త అవకాశం ఉంది. దుబాయ్ వరల్డ్ ట్రేడ్ సెంటర్‌లో దుబాయ్ స్పోర్ట్స్ వరల్డ్ ప్రారంభమైంది.  ఇది ఉచిత జిమ్ మరియు 1 కిలోమీటరు ఇండోర్ వాకింగ్ మరియు జాగింగ్ ట్రాక్‌ను అందిస్తోంది. ఇది 2,82,000 చదరపు అడుగుల ఎయిర్ కండిషన్డ్ స్థలంలో డజన్ల కొద్దీ క్రీడా సౌకర్యాలను కూడా కలిగి ఉంది.  

16వ ఎడిషన్‌లోకి అడుగుపెట్టిన ఈ వార్షిక సమ్మర్ కార్యక్రమం ఆగస్టు 25 వరకు కొనసాగుతుంది. ఎండల నుండి ఉపశమనం పొందుతూ, యాక్టివ్ గా ఉండాలనుకునే వేలాది మంది నివాసితులను ఇది ఆకర్షిస్తుందని భావిస్తున్నారు.

ఈ వేదికలో ఆరు ఫుట్‌బాల్ పిచ్‌లు, 15 బ్యాడ్మింటన్ కోర్టులు, బాస్కెట్‌బాల్ కోర్టులు, క్రికెట్ సౌకర్యాలు, పాడెల్ కోర్టులు, పికిల్‌బాల్, టేబుల్ టెన్నిస్ మరియు వాలీబాల్ ప్రాంతాలతో సహా 41 కోర్టులు, పిచ్‌లు మరియు యాక్టివిటీ జోన్‌లు ఉన్నాయి. పిల్లలు మరియు పెద్దల కోసం కోచింగ్ కార్యక్రమాలను కూడా అందిస్తున్నారు. 

ఈ సంవత్సరం అతిపెద్ద ఆకర్షణలలో ఒకటిగా ఉన్న ఫ్రీ జిమ్ లో అత్యాధునికమైన కార్డియో మెషీన్లు, రెసిస్టెన్స్ పరికరాలు ఉన్నాయి. చల్లని వాతావరణంలో వాకింగ్, జాగింగ్ చేయడం లేదా తేలికపాటి వ్యాయామం చేయడానికి ఇష్టపడే వారికి ప్రత్యేకంగా కేటాయించిన 1 కి.మీ. ఇండోర్ ట్రాక్ మరో ప్రత్యేక ఆకర్షణగా నిలుస్తోంది.

అలాగే, ఈ వేదికలో పిల్లల కోసం ప్రత్యేకంగా ప్లే గ్రౌండ్స్, ఎయిర్ బెలూన్ లు, గేమింగ్ ప్రాంతాలు మరియు రకరకాల ఫుడ్ ట్రక్కులు కూడా ఉన్నాయి.  

బయట ఉష్ణోగ్రతలు విపరీతంగా ఉన్నప్పటికీ, నివాసితులు యాక్టివ్ గా ఉండటానికి, స్నేహితులు మరియు కుటుంబ సభ్యులతో కనెక్ట్ అవ్వడానికి, ఇంకా అనేక రకాల కార్యకలాపాలను ఆస్వాదించడానికి ఒక స్థలాన్ని అందించడమే తమ లక్ష్యమని నిర్వాహకులు తెలిపారు.

ప్రతిరోజూ ఉదయం 8 గంటల నుండి అర్ధరాత్రి వరకు తెరిచి ఉండే ఈ వేదిక.. అథ్లెట్లు మరియు ఫిట్‌నెస్ ఔత్సాహికుల నుండి మొదలుకొని పాఠశాల విద్యార్థుల వరకు అందరికీ అందుబాటులో ఉంటుందని వెల్లడించారు.