అక్కినేని యువ నటుడు అఖిల్ సరికొత్త యాక్షన్ ప్యాక్డ్ లవ్ స్టోరీతో ప్రేక్షకులను అలరించేందుకు సిద్ధమయ్యాడు. ఆయన కథానాయకుడిగా నటిస్తున్న తాజా చిత్రం ‘లెనిన్’ (Lenin). ఈ సినిమాకు సంబంధించిన అఫీషియల్ ట్రైలర్‌ను మేకర్స్ తాజాగా విడుదల చేశారు. వైజాగ్‌లో నిర్వహించిన ఓ గ్రాండ్ ఈవెంట్‌లో ఈ ట్రైలర్‌ను లాంచ్ చేశారు. రాయలసీమ బ్యాక్‌డ్రాప్‌లో సాగే పవర్‌ఫుల్ రొమాంటిక్ యాక్షన్ డ్రామాగా ఈ సినిమా రూపొందుతున్నట్లు ట్రైలర్ చూస్తే అర్థమవుతోంది. ఈ ట్రైలర్‌కు టాలీవుడ్ కింగ్ నాగార్జున అందించిన వాయిస్ ఓవర్ ప్రత్యేక ఆకర్షణగా నిలిచింది.

మురళీ కిశోర్ దర్శకత్వం..అఖిల్‌కు జోడీగా భాగ్యశ్రీ బోర్సే
‘వినరో భాగ్యము విష్ణుకథ’ సినిమాతో డైరెక్టర్‌గా మంచి గుర్తింపు తెచ్చుకున్న మురళీ కిశోర్ అబ్బూరు ఈ చిత్రానికి దర్శకత్వం వహిస్తున్నారు. ఈ సినిమాలో అఖిల్ సరసన టాలెంటెడ్ బ్యూటీ భాగ్యశ్రీ బోర్సే హీరోయిన్‌గా నటిస్తోంది. ఈ ప్రతిష్టాత్మక ప్రాజెక్ట్‌ను కింగ్ నాగార్జునతో కలిసి ప్రముఖ నిర్మాత సూర్యదేవర నాగవంశీ భారీ బడ్జెట్‌తో సంయుక్తంగా నిర్మిస్తున్నారు. ఇప్పటికే టాకీ పార్ట్ పూర్తి చేసుకున్న ఈ చిత్రం, ప్రస్తుతం శరవేగంగా పోస్ట్ ప్రొడక్షన్ పనులను జరుపుకుంటోంది.

తాజాగా విడుదలైన ట్రైలర్ సినిమాపై అంచనాలను భారీగా పెంచేసింది. ఇందులో మాస్ ఆడియన్స్‌కు నచ్చే యాక్షన్ ఎలిమెంట్స్‌తో పాటు యువతను ఆకట్టుకునే బలమైన లవ్ స్టోరీని దర్శకుడు అద్భుతంగా చూపించినట్లు తెలుస్తోంది. యాక్షన్, రొమాన్స్ సమపాళ్లలో కుదిరిన ఈ ‘లెనిన్’ చిత్రాన్ని జూలై 10న ప్రపంచవ్యాప్తంగా థియేటర్లలో విడుదల చేసేందుకు నిర్మాతలు ప్లాన్ చేస్తున్నారు. ఈ సినిమాతో అఖిల్ కెరీర్‌లో సాలిడ్ హిట్ అందుకోవడం ఖాయమని అక్కినేని అభిమానులు ధీమా వ్యక్తం చేస్తున్నారు.