యూఏఈ: అన్ని డిజిటల్ మరియు సాంప్రదాయ మీడియాలో చిల్డ్రన్ వినియోగించే కంటెంట్ నాణ్యత మరియు భద్రతను పెంచే విస్తృత ప్రయత్నంలో భాగంగా.. యూఏఈ చిల్డ్రన్ మీడియా కంటెంట్ కోసం జాతీయ ప్రమాణాలను ప్రవేశపెట్టనుందని జాతీయ మీడియా అథారిటీ ప్రకటించింది.

చైల్డ్ డిజిటల్ సేఫ్టీ కౌన్సిల్ సహకారంతో ఈ కొత్త ఫ్రేమ్‌వర్క్‌లను అభివృద్ధి చేస్తున్నట్లు అథారిటీలోని మీడియా విభాగం సీఈఓ మైతా మజీద్ అల్ సువైది తెలిపారు. ఇవి మీడియా సంస్థలు, డిజిటల్ ప్లాట్‌ఫారమ్‌లు, కంటెంట్ సృష్టికర్తలు మరియు కుటుంబాలకు జాతీయ సూచనగా ఉపయోగపడతాయని అన్నారు.

పిల్లలకు అందించే కంటెంట్ నాణ్యతే తమ ముందున్న సవాల్ అని,  కేవలం పిల్లలను ప్రమాదాల నుండి రక్షించడం గురించి మాత్రమే మాట్లాడటం లేదని, వారి నైపుణ్యాలను అభివృద్ధి చేసి, సానుకూల విలువలను నూరిపోసే మీడియా కంటెంట్‌కు మద్దతు ఇవ్వడం గురించి కూడా మాట్లాడుతున్నట్లు పేర్కొన్నారు.  

జాతీయ మీడియా అథారిటీ రెండు కార్యక్రమాలను ప్రవేశపెట్టనుంది. మొదటిది పిల్లల కోసం జాతీయ మీడియా కంటెంట్ ప్రమాణాల గైడ్. ఇది ప్రతి వయస్సుల వారికి ఏ కంటెంట్ సరైనదో నిర్వచించడంతో పాటు, మీడియా సంస్థలు, డిజిటల్ ప్లాట్‌ఫారమ్‌లు మరియు కంటెంట్ సృష్టికర్తలకు ఒక నిర్బంధ సూచనగా ఉపయోగపడుతుంది.

రెండవది వయస్సు వర్గీకరణ విధానం మరియు మార్గదర్శక ఫ్రేమ్ వర్క్. ఇది కేవలం సోషల్ మీడియా మరియు డిజిటల్ ప్లాట్‌ఫారమ్‌లనే కాకుండా పుస్తకాలు, సినిమాలు మరియు సంగీతాన్ని కూడా కలిగి ఉన్న అన్ని కళాత్మక మరియు మీడియా రచనలను కవర్ చేస్తుంది.

ఈ ఫ్రేమ్ వర్క్ కలిసి, యువ ప్రేక్షకుల కోసం మీడియా కంటెంట్ మొత్తం నాణ్యతను పెంచుతూ, తమ పిల్లలకు అందించే కంటెంట్ గురించి తల్లిదండ్రులు మరింత సమాచారంతో కూడిన నిర్ణయాలు తీసుకునేలా శక్తినిచ్చే ఒక సమగ్ర జాతీయ సూచనను ఏర్పాటు చేయడమే లక్ష్యంగా పెట్టుకున్నాయి.

పిల్లలను ఉద్దేశించిన మీడియా కంటెంట్‌ను జాతీయ మీడియా అథారిటీ నిరంతరం పర్యవేక్షిస్తుందని, అది జాతీయ ప్రమాణాలు మరియు వర్తించే చట్టాలకు అనుగుణంగా ఉందో లేదో అంచనా వేస్తుందని అల్ సువైది చెప్పారు.

మారుతున్న పరిస్థితులకు అనుగుణంగా

డిజిటల్ కంటెంట్ పర్యావరణ వ్యవస్థలో వేగంగా వస్తున్న మార్పులకు అనుగుణంగా, బాల్యంలోని ప్రతి దశలో పిల్లల అభివృద్ధి అవసరాలకు స్పందించేలా ఈ కొత్త ప్రమాణాలను రూపొందిస్తారు.

ఈ ఫ్రేమ్‌వర్క్‌లు యూఏఈ యొక్క ప్రస్తుత మీడియా నిర్మాణాన్ని బలోపేతం చేస్తాయని, అదే సమయంలో సురక్షితమైనదే కాకుండా, నిజంగా విజ్ఞానాన్ని అందించే కంటెంట్‌ను అందించడానికి మీడియా సంస్థలు మరియు డిజిటల్ ప్లాట్‌ఫారమ్‌లపై మరింత బాధ్యతను ఉంచుతాయని అల్ సువైది పేర్కొన్నారు.

పిల్లల గొంతుకు విలువ ఉంటుంది

కొత్త కంటెంట్ ప్రమాణాలను రూపొందించడంలో పిల్లలనే భాగస్వాములను చేస్తామని, ప్రతి వయస్సుల వారికి ఏ కంటెంట్ నిజంగా సముచితమైనది మరియు ప్రయోజనకరమైనది అని నిర్వచించడంలో వారి ఆలోచనలను ముఖ్యమైనవిగా పరిగణిస్తామని అధికారులు వెల్లడించారు.

పిల్లల సోషల్ మీడియా వినియోగంపై విస్తృత క్యాబినెట్ తీర్మానంతో పాటు ఈ ప్రకటన వెలువడింది. ఈ తీర్మానం సోషల్ మీడియా ఖాతాలను సృష్టించడానికి కనీస వయస్సును 15 సంవత్సరాలుగా నిర్దేశించడంతో పాటు, ఏఐ (AI) ఆధారిత గుర్తింపు ధృవీకరణను కూడా ప్రవేశపెట్టింది.