మనామా: బహ్రెయిన్, కువైట్, జోర్డాన్‌లను లక్ష్యంగా చేసుకుని ఇరాన్ పలుమార్లు క్షిపణులు, డ్రోన్లతో దాడులు చేయడాన్ని బహ్రెయిన్ విదేశాంగ మంత్రిత్వ శాఖ తీవ్రంగా ఖండించింది. ఈ దాడులు ఆయా దేశాల సార్వభౌమాధికారాన్ని ఉల్లంఘించడమే కాకుండా, ఐక్యరాజ్యసమితి చార్టర్‌తో పాటు భద్రతా మండలి తీర్మానాలను కూడా ఉల్లంఘిస్తున్నాయని పేర్కొంది. ప్రాంతీయ భద్రతకు ముప్పు కలిగించే ప్రమాదకర పరిణామంగా ఈ చర్యలను అభివర్ణించింది.

దాడులను విజయవంతంగా అడ్డుకున్న మిత్రదేశాల సాయుధ దళాలు, వైమానిక రక్షణ వ్యవస్థలను బహ్రెయిన్ అభినందించింది. ఐక్యరాజ్యసమితి చార్టర్‌లోని ఆర్టికల్ 51 ప్రకారం ప్రతి దేశానికి ఆత్మరక్షణ హక్కు ఉందని విదేశాంగ మంత్రిత్వ శాఖ స్పష్టం చేసింది. ఇరాన్ చర్యలకు బాధ్యత వహించేలా అంతర్జాతీయ సమాజం, ఐక్యరాజ్యసమితి భద్రతా మండలి తక్షణ చర్యలు తీసుకోవాలని బహ్రెయిన్ కోరింది. అలాగే హోర్ముజ్ జలసంధి గుండా సముద్ర రవాణాకు స్వేచ్ఛను కల్పించడంతో పాటు అన్ని శత్రుత్వ చర్యలను వెంటనే నిలిపివేయాలని డిమాండ్ చేసింది.