హైదరాబాద్: వియత్నాంలో జరిగిన ఘోర పడవ ప్రమాదంలో ప్రాణాలు కోల్పోయిన ఆంధ్రప్రదేశ్‌కు చెందిన ముగ్గురు వ్యక్తుల మృతదేహాలు ఈరోజు (మంగళవారం) ఉదయం 7:30 గంటలకు హైదరాబాద్‌లోని శంషాబాద్ అంతర్జాతీయ విమానాశ్రయానికి చేరుకున్నాయి. విమానాశ్రయం కార్గో టెర్మినల్‌కు చేరుకున్న మృతదేహాలను చూసి కుటుంబ సభ్యులు, బంధువులు కన్నీరుమున్నీరుగా విలపిస్తున్నారు. బాధితుల స్వస్థలాలకు మృతదేహాలను తరలించేందుకు ఏపీ ప్రభుత్వం ప్రత్యేక ఏర్పాట్లు చేసింది.

మృతుల వివరాలు.. ముంబై మీదుగా హైదరాబాద్‌కు..
ఈ విషాద ఉదంతంలో మరణించిన వారిని కడప జిల్లాకు చెందిన శ్రీధర్, కృష్ణా జిల్లా మచిలీపట్నానికి చెందిన జయశ్రీ, శ్రీ సత్యసాయి జిల్లా హిందూపురానికి చెందిన రవితేజగా అధికారులు గుర్తించారు. వియత్నాం నుంచి మృతదేహాలను భారత్‌కు తీసుకురావడానికి అవసరమైన అన్ని చట్టపరమైన, దౌత్యపరమైన ప్రక్రియలను మొదట ముంబైలో పూర్తి చేశారు. అనంతరం అక్కడి నుంచి ప్రత్యేకంగా శంషాబాద్ విమానాశ్రయానికి తరలించి, అధికారుల సమక్షంలో నేరుగా కుటుంబ సభ్యులకు అప్పగించారు.

శంషాబాద్‌కు చేరుకున్న ఏపీ మంత్రి కొండపల్లి శ్రీనివాస్

బాధిత కుటుంబాలను పరామర్శించేందుకు ఆంధ్రప్రదేశ్ మంత్రి కొండపల్లి శ్రీనివాస్ శంషాబాద్ విమానాశ్రయానికి చేరుకున్నారు. విమానాశ్రయం వద్ద మృతుల కుటుంబ సభ్యులను కలసి వారిని ఓదార్చారు. ప్రభుత్వ పరంగా అండగా ఉంటామని భరోసా ఇస్తూ, కుటుంబ సభ్యులకు, సన్నిహితులకు ధైర్యం చెప్పారు. అనంతరం మృతదేహాలను వారి వారి స్వస్థలాలకు పంపించే ప్రక్రియను మంత్రి స్వయంగా దగ్గరుండి పర్యవేక్షించారు.

శంషాబాద్ విమానాశ్రయం నుంచి మృతుల స్వస్థలాలైన కడప, మచిలీపట్నం, హిందూపురం ప్రాంతాలకు భౌతికకాయాలను తరలించేందుకు ఆంధ్రప్రదేశ్ ప్రభుత్వం ఉచిత అంబులెన్స్ సదుపాయాన్ని కల్పించింది. విదేశాల్లో జరిగిన ఈ ప్రమాదంలో ఆకస్మికంగా తమ వారిని కోల్పోయి పుట్టెడు దుఃఖంలో ఉన్న బాధిత కుటుంబాలకు అన్ని విధాలా అండగా ఉంటామని, అవసరమైన తదుపరి సహాయాన్ని కూడా అందిస్తామని మంత్రి కొండపల్లి శ్రీనివాస్ ఈ సందర్భంగా హామీ ఇచ్చారు.