రియాద్: సౌదీ అరేబియాలో సాధారణ విద్యా వ్యవస్థను మరింత బలోపేతం చేయడానికి కొత్త జనరల్ ఎడ్యుకేషన్ లా (General Education Law)ను ఆమోదించారు. ఈ చట్టం ద్వారా విద్యా రంగంలో పరిపాలనను మెరుగుపరచడం, విద్యా ప్రమాణాలను పెంచడం, విజన్–2030 లక్ష్యాల సాధనకు మద్దతు అందించడం లక్ష్యంగా పెట్టుకున్నారు. ఈ సందర్భంగా విద్యాశాఖ మంత్రి యూసుఫ్ అల్-బెన్యాన్ మాట్లాడుతూ.. ఈ చట్టానికి ఆమోదం తెలిపిన కింగ్ సల్మాన్ మరియు యువరాజు, ప్రధానమంత్రి మహ్మద్ బిన్ సల్మాన్ కు కృతజ్ఞతలు తెలిపారు. విద్యా రంగంలో సంస్కరణలకు ఇది కీలక ముందడుగుగా అభివర్ణించారు.

కొత్త చట్టం ప్రకారం విద్యాశాఖ, జనరల్ ఎడ్యుకేషన్ అఫైర్స్ కౌన్సిల్‌తో పాటు సంబంధిత సంస్థల విధులు, బాధ్యతలను స్పష్టంగా నిర్వచించారు. దీనివల్ల విద్యా విధానాల సమన్వయం, నిర్ణయాల ప్రక్రియ, పర్యవేక్షణ మరింత సమర్థవంతంగా సాగనుంది. అలాగే ప్రైవేట్, లాభాపేక్షలేని సంస్థలు విద్యా రంగంలో భాగస్వామ్యం కావడానికి ప్రత్యేక నియంత్రణ వ్యవస్థను రూపొందించారు. దీని ద్వారా పెట్టుబడులను ప్రోత్సహించడం, విద్యా భాగస్వామ్యాలను విస్తరించడం, సేవల నాణ్యతను మెరుగుపరచడం, విద్యా అవకాశాలను పెంచడం లక్ష్యంగా పెట్టుకున్నారు.

ఈ చట్టం విద్యను ప్రతి ఒక్కరి హక్కుగా గుర్తిస్తూ విద్యార్థులు, ఉపాధ్యాయుల హక్కులకు రక్షణ కల్పిస్తుంది. సురక్షితమైన, ప్రోత్సాహకరమైన విద్యా వాతావరణాన్ని కల్పించడంతో పాటు, విద్యార్థుల అభ్యాసంలో కుటుంబాల పాత్రను కూడా బలోపేతం చేస్తుంది. చిన్నారుల అభివృద్ధిలో ప్రారంభ బాల్య విద్య ప్రాధాన్యాన్ని గుర్తిస్తూ ఆ రంగానికి ప్రత్యేక ప్రాధాన్యం ఇచ్చారు. అలాగే దివ్యాంగ విద్యార్థులకు మెరుగైన విద్యా, సహాయక సేవలు అందించడం, ప్రతిభావంతులైన విద్యార్థులను ప్రోత్సహించే కార్యక్రమాలను విస్తరించడంపై కూడా దృష్టి సారించారు. చట్టం అమలుకు అవసరమైన నిబంధనలను త్వరలో రూపొందించి, సంబంధిత ప్రభుత్వ శాఖలతో కలిసి సమర్థవంతంగా అమలు చేస్తామని సౌదీ విద్యాశాఖ వెల్లడించింది.