కువైట్ సిటీ: సహకార సంఘాల సెంట్రల్ మార్కెట్లు, వాటి శాఖల్లో ఒకే బిల్లుపై గరిష్ఠంగా ఐదు కార్టన్ల బాటిల్ వాటర్ మాత్రమే కొనుగోలు చేయాలనే నిబంధన కొనసాగుతుందని కువైట్ సామాజిక వ్యవహారాల మంత్రిత్వ శాఖ మరోసారి స్పష్టం చేసింది. అనవసరంగా భారీగా కొనుగోళ్లు చేసి నిల్వ చేసుకోవడాన్ని అరికట్టడంతో పాటు ప్రతి వినియోగదారుడికి సమానంగా నీటి సరఫరా అందేలా ఈ పరిమితిని కచ్చితంగా అమలు చేయాలని సామాజిక వ్యవహారాలు, కుటుంబం, బాలల సంక్షేమ శాఖ మంత్రి డాక్టర్ అమ్థల్ అల్-హువైలా ఆదేశించారు. 

అవసరానికి మించి బాటిల్ వాటర్ కొనుగోలు చేయడం వల్ల ప్రజల్లో ఆందోళన పెరిగి, అవసరానికి మించిన నిల్వలు చేసుకునే పరిస్థితి ఏర్పడుతుందని మంత్రిత్వ శాఖ పేర్కొంది. అందుకే విక్రయాలను నియంత్రించడం, దుకాణాల వద్ద రద్దీని తగ్గించడం, అన్ని మార్కెట్లలో బాటిల్ వాటర్ అందుబాటులో ఉండేలా చూడడమే ఈ నిర్ణయం ఉద్దేశమని వివరించింది.

ఈ పరిమితి నీటి కొరత కారణంగా విధించలేదని మంత్రిత్వ శాఖ స్పష్టం చేసింది. నీటి ఉత్పత్తి సంస్థలు మార్కెట్ అవసరాలకు తగినంత ఉత్పత్తి చేస్తూ నిరంతర సరఫరా కొనసాగిస్తున్నాయని, నిల్వల కోసం అధికంగా కొనుగోళ్లు చేయకుండా బాధ్యతాయుతంగా వ్యవహరించేలా ప్రోత్సహించేందుకే ఈ నిర్ణయం తీసుకున్నట్లు తెలిపింది.

నిబంధన అమలును నిరంతరం పర్యవేక్షిస్తున్నామని, ఎలాంటి ఉల్లంఘనలు లేదా నిర్లక్ష్యాన్ని సహించబోమని మంత్రిత్వ శాఖ హెచ్చరించింది. అలాగే పౌరులు, ప్రవాసులు తమ అవసరానికి తగినంత మాత్రమే కొనుగోలు చేయాలని, అనవసర ఆందోళన కలిగించే తప్పుడు సమాచారాన్ని వ్యాప్తి చేయవద్దని విజ్ఞప్తి చేసింది. మార్కెట్ అవసరాలకు తగినంత ఉత్పత్తి, సరఫరా కొనసాగుతున్నందున ఆందోళన చెందాల్సిన అవసరం లేదని స్పష్టం చేసింది.